Indian Air Force Eastern Air Command Air Marshal KK Nohwar, PVSM, VM, AOC-in C chuan vawiin khan Chief Minister Pu Lal Thanhawla chu a chenna bungalow ah a hmu a, Indian Air Force (IAF) in Mizorama mamawh an neih te Chief Minister hi a sawipui.

Air Marshal KK Nohwar chuan Mizoram chhim lama Zokhawtlang hmuna Surveillance Radar dah tur chungchanga survey neih mek chu Chief Minister hi a sawipui a. Hemi atan hian hmun zau tawk tak, school te, canteen te leh intihhlimna hmunte a awm tur thu sawiin tualchhung mite pawhin an chhim ve theih tur thu Pu Hawla hi a hrilh a. Hemi bakah hian Lengpui Airportah IAF in Jet Fighter 4 tal dah an duhthu hrilhin hemi atan hian a in (jet fighter 1 zel dahna tur) 'Blastpan' 4, cement concrete a sak 35 x 25 metres zela lian hmun tur runway thlang lamah remchang thei se tih chu Chief Minister hi a sawipui bawk a. Chief Minister chuan an mamawhte chu Mizoram sorkar atang chuan harsatna a awmloh tur thu hrilhin defence lama pawimawhna kan nei ve thei anih chuan theihtawp kan chhuah ang a ti.

Pi Lal Riliani hian Air Marshal hnenah hian Mizo kutchhuak thilpek a hlan a, Air Marshal KK Nohwar hian Chief Minister hnenah hian thilpek a hlan bawk a ni.

Air Marshal hi Wing Commander SM Chaudhury an a rawn tawiawm a, Chief Minister hi a nupui Pi Lal Riliani bakah Wing Comd (Rtd) Lalzawma, Principal Consultant, Civi Aviation leh Pu RL Rinawma, Commissioner/ Secretary to GOM ten an tawiawm a ni.