No.1897/2021-2022

Kolasib dated 17th August 2021: Tukin dar 2:00 AM bawr vela Aitlang, Vairengte Police duty-na bula thil thlen dan chungchang Dr.H.Lalthlangliana, Deputy Commissioner, Kolasib district chuan sawifiahin, ramri duty-na hmun hrang hrangte chu mipuite tan tlawh rih lo tura ngenna thuchhuah siam tawh chu harsatna a awm chhunzawm loh nan zawm hram turin mipuite a chah nawn leh bawk a ni.

Dr.H.Lalthlangliana chuan thil thlenna hmun chu Aitlanga Mizoram Police duty-na hmun thlang, Bilaipur hnaih lam a nih thu sawiin thil thlen dan ngun taka chhui a nih hnuah Assam Police Duty-te hi silai hmet puaktu zawk an ni tih hriat a nih thu a sawi. DC chuan Vairengte mi 3-te hi Nibus-a tia hriat, Bilaipur mi chuan ui lei tura chah chhuakin, Aitlangpui an thlen hnu hian Assam Police Duty-te chuan silai an hmet puak ta a ni, a ti. Anni pathum hi Silai a puah hnua an tlan darhna lamah an zinga pakhat chuan a ban a sawh na deuh nia hriat a nih thu leh midangte hi chuan hliam an neih loh thu a sawi bawk. Kolasib DC chuan ramri hmun thenkhatah buaina a chhuah loh nan Police-te duty tir a nih mek laiin mipuite pawhin harsatna an tawh palh loh nan tlawh lo turin a chah a. Assam Police duty-ten civil mite chunga silai an hmeh puah chungchanga lungawi lohna hi DC, Hailakandi hnenah ziak a thlen a ni tih sawiin Dr.H.Lalthlangliana chuan Vairengte mi 3 thlem chhuaktu Nibus-a tia hriat hi zawng chhuak a thubuai siam sak ngei tura hriattir a nih thu a sawi bawk a ni. DC chuan ramria buaina tipunlun zawnga thu thehdarh awm lo tura a duh thu sawiin sawrkarin a tul apiangah hma a lak zel tur thu a sawi bawk a ni.