Member of Parliament (Lok Sabha) inthlanna tura inpuahchahna kal zelah vawiin khan Aizawl DC Conference Hall-ah District Election Officer Pi Juhi Mukherjee hovin First Level Checking of EVM neih a ni a. Inthlannaa hman tur EVM 456 te chu ni 24 - 27 March, 2014 chhung hian endik vek tura ruahman a ni. Vawiin EVM endiknaah hian political party tin aiawh an tel a, DEO Pi Juhi Mukherjee chuan vote thlak ni-ah harsatna awm lova tluang taka kalpui a nih theih nan EVM check uluk a pawimawhzia sawiin, party aiawhte pawh ngun tak leh uluk taka lo enpui tur leh an hriatchian loh lai te zawtfiah zel turin a chah a ni. EVM endik hna hi EVM siamtu company BEL atanga engineer lo kal ten an buaipui a, Mock Poll pawh neih nghal a ni bawk.

EVM dah thatna Strong Room chu Assembly Annex Basement ah siam a ni a, inthlan zawha Polling Party / EVM lo dawnsawnna tur Receiving Counter leh Vote chhiarna tur Counting Hall te pawh Assembly Annex vekah hian siam tura ruahman a ni bawk. Strong Room hi Observer Dr Rakesh Gupta leh DEO Pi Juhi Mukherjee te chuan ni 22/3/2014 (Inrinni) khan tlawhin an lo enfiah tawh bawk a ni.