Aizawl Art Gallery in an kum 10 tlin lawm nana an buatsaih Group Exhibition of Paintings- Pu Vanlalhriata, Lalrinsangi, Alyssa Lalrinsangi, Tv R. Lalruatkima leh Pu Tanpuia te kut chhuak pho chhuahna chu Vawiin chhun Dar 12:00 khan Pu Chalrosanga, MLA in Aizawl Art Gallery, MUP Headquarters Building ah a hawng.

Group Painting Exhibition hawngtu Pu Chalrosanga, MLA chuan, 'Mizo Artist te lemziak pho chhuah hawng theia a awm chu lawmawm a tih thu sawiin, Artist te thlen chin a hmuhin a rin phak bak a thiam a tih thu te, Mizo Artist te kut chhuak a lakkhawm te chu hnam dang rawn hmutute pawhin chhuanawm an tihzia an hrilh thin thute a sawi a. Mizo artist te chu National level ah pawh kal zel tura beiseina a neihsan thu te, an kal zelna a tana theih tawp chhuahpui a inhuam thu sawiin, Sawrkar in lemziak mite ram leh hnam tana an hlutna a hriat thu leh an kal zelna a tana sum hman tur pawh anmahni buaipuitu ber I&PR Department kuta a dah thu te, Mizoram Art Development Society a tel artist te pawh an thiamna hmang tangkai in Mizoram rawn tlawhtute mit hmuhah Mizoram chu Arts lama dinhmun sang taka hlangkai turin artist te a fuih bawk a ni.

Aizawl Art Gallery neitu Pu Tanpuia'n report a a tarlan danin, Group Exhibition of Paintings hian April 2, Inrinni thleng a awh ang a, hemi hun chhung hian nitin chawhma Dar 10 tanga zan dar 7 thleng a duh a piang tan tlawh theih a ni ang. Water Colour, Acrylic on canvas, Oil on Canvas, Mix Media leh Charcoal hmanga lemziak 62 pho chhuah a ni a. A lei duh tan pawh Exhibition chhung hian man tlawm zawka lei theih a ni ang.

Group Exhibition hawnna hi Pu Vanlalhriata, General Secretary, MADS chuan a kaihruai a, Artist telte zinga mi Nl Lalrinsangi chuan khuallian hnenah hian thilpek a hlan bawk a ni.