Vawiin Chawhma dar 11:00 khan Aizawl Art Gallery buatsaih Painting Exhibition 2017 chu a duh a piang tlawh theih turin Pi K. Lalrinzuali, Additional Secretary, Rural Development, Govt. of Mizoram  chuan Aizawl Art Gallery, MUP Building ah a hawng. 

Painting Exhibition hawngtu Pi K. Lalrinzuali chuan, Artist te kut chhuak lemziak a ngaihsan thu sawiin,  Lemziak phenah thu ngaihnawm leh inthup tam tak a awm thin a, Realistic, Abtract painting a ni emaw, Artist te kut chhuak lemziakin thuchah ropui tak tak a ken telte chu mi nawlpui pawhin an chhiar thiam tul a tih thu a sawi a ni.         

Painting Exhibition hawnnaah hian Aizawl Art Gallery neitu Pu Laltanpuia’n report pein, Lemziak thiam mi 14 te kut chhuak 98 pho chhuah a ni a. April 24 – 29 chhung hian nitin chawhma dar 10:00 atanga zan dar 7:00 thlengin a duh a piang tan man chawi lovin a tlawh theih dawn a. Lemziak pho chhuahte hi a duh tan lei theih a ni bawk ang. Aizawl Art Gallery hian Painting Exhibition an buatsaih thin bakah Home hrang hrangah lemziak chi hrang hrang an lo sem chhuak tawh thin a, mamawhtute tan Blood Donation camp pawh an lo buatsaih tawh thin a ni.