No.3729/2020-2021

Vawiin khan Aizawl Bawrhsap leh District Municipal Election Officer ni bawk Pu R.Lalramnghaka hovin Local/Village Councils Election, 2020 lo awm tura inbuatsaihna chungchang-ah Nodal Officers leh Asst. Nodal Officers te nen Aizawl DC Conference Hall-ah meeting neih a ni.

Aizawl District Municipal Election Officer Pu R. Lalramnghaka chuan Local/Village Election, 2020 tluang taka neih a nih theihnan, Nodal/Asst. Officer te theihtawp chhuah turin a chah a, kum dang election ai pawhin ruahmanna siam uluk a ngai ang, tiin a sawi a. State Election Commission-in Local/Village Election ni (date) la puang lo mah se, engtik lai pawha puan theih a nih avangin, inpuahchahna neih chhoh chu a tul a ni, tiin a sawi bawk a ni.

He meeting-ah hian Nodal Officer ten ni 10.08.2020-ah Election atana an ruahmanna (plan) siamte Election Officer Pi V.Lalmuanpuii hnenah thehluh ni se tih rel a ni. COVID-19 hripui len lai a nih avangin Election buaipui tu leh voter ten an zawmtur inkaihhruaina (Standard Operating Procedure) pawh duan ni se, tih rel a ni bawk a ni.

Aizawl District huam chhunga Local Councils Election, 2020-ah hian Local Council 83 awmin, Polling Station 83 leh Polling Booth 227 buatsaih a ni. Sesawng Village Council chu Village Council pathum- Sesawng Village Council, Sesawng Field Veng Village Council leh Sesawng Vengthar Village Council a then a nih tak avangin Village Councils Election, 2020-ah hian Village Council 67 thin chu 69 a ni a, Polling Station 69 leh Polling Booth 88 buatsaih a ni.