2828/2022-2023
Aizawl 28th November 2022: Vawiin khan IBM Skillsbuild-School Chapter chu Government Mizo High School, Aizawl ah Dr. Lalhriatzuali Ralte, IAS, Deputy Commissioner chuan a hawng a, he hawnna inkhawmah hian Bawrhsap chuan thu sawiin, IBM Skillsbuild ten India hmarchhak state zinga Mizoram an thlang hmasa ber chu lawmawm a tih thu a sawi a ni. He project-in a tum ber chu thalaite hnathawk thei rual an nih hunah anmahni tuina zawng tak hmanga eizawnna nghet an neih theihna tura thiamna bik pek a nih thu sawiiin, Mizo thalaiten an hlawkpui ngei a beisei thu a sawi.

District Skill Committee Chairperson ni bawk Dr. Lalhriatzuali Ralte chuan Central leh State sawrkar pawhin Skill Development a ngaih pawimawh hle thu sawiin, he project hmang hian thalai tam takin IBM Portal kaltlangin an tuina zawnah thiamna hrang hrang a thlawnin an zir thei dawn a, chu chuan nasa takin ram intodelh leh hmasawnna a thlen theih dawn avangin zirlaite chu ngai pawimawha hmang tangkai turin a chah nghal a ni.

Vawiin inkhawmah hian Aizawl Tech- School Competition lawmman sem nghal a ni a. Best TechSchool of The Year ah St.Paul’s Higher Secondary School chu thlan niin Best TechSchool of The Year (High School Section ) ah Ramhlun South High School chu thlan a ni bawk.

IBM Skillsbuild hi Ministry of Skill Development & Entrpreneurship (MSDE) leh International Business Machine (IBM) thawhhona a ni a, he project-in a tum ber chu a thlawna thalaite hnena eizawnna tling thiamna bik zirtir, tunlai Technology changkang tak tak hman tangkai te, thalai zinga thiamna inthup haichhuahsak te, mahni tuina bera hlawhtling tura thiamna pek te, an tui zawk haihchhuahsak te niin chu thiamna hmanga India ram ei leh bara intodelh leh ram hmasawnna thlen hi a ni.

October ni 31, 2022 atang khan IBM Skillsbuild-College Chapter chu College 10- ah kalpui lo ni tawhin, vawiina hawn IBM Skillsbuild - School Chapter hi sikul 15 -ah kalpui tum a ni.