No.4344/2020-2021

State Disaster Management Authority chuan Aizawl Municipal Corporation Area chhunga Lockdown ni 21.08.2020, dar 04:30AM thleng kalpui a lo rel tawh chu ni 24.08.2020, dar 04:30AM thleng a pawt sei a. He mi hun chhung atan hian Disaster Management & Rehabilitation Department chuan Lockdown kaihhruaina hetiang hian thupek a chhuah a ni:

He thupek hian a hma-a Lockdown kaihhruaina lo chhuah tawh chu hemi hun chhung atan hian a luahlan ang.

1. Lengpui airport chu hawn chhunzawm a ni ang. Amaherawhchu, Lengpui airport atanga Mizoram rawn lut tur te chuan mCOVID-19 mobile application a mFliqht emaw mcovid-19.mizoram.gov.in a mpass-FLIGHT hmangin phalna an la hmasa tur a ni.

2. Pawn lam atanga Aizawl municipal area a luh leh Aizawl municipal area atanga chhuah (zin veivah) khap a ni. Hei hian Home department-in Mizoram luh phalna a pek te, Mizoram pawna chhuak tur te, damlohna (medical emergency) leh chhiat tawh thil-a chhungkhat hnai zual (pi leh pu, nu leh pa, tu leh fa leh pianpui unau) te veivahna a huam lovang. Medical emergency leh chhiat tawh thilah te chuan Deputy Commissioner, Aizawl phalna lak tur a ni a, phalna dil dan tur kalphung (online/ offline) erawh chu Deputy Commissioner, Aizawl in mipui hriat atan a puangzar ang.

3. Aizawl municipal area pawn atangin nitin mamawh (essential commodities) chauh lak luh phal a ni. Heng bungraw chawkluh leh Aizawl atang/paltlanga heng bungrua te thiar chungchangah Deputy Commissioner in ruahmanna a siam ang.

4. Aizawl municipal area-ah chuan nitin mamawh (essential commodities) zawrhna dawr te chu Deputy Commissioner leh LLTF te ruahmanna siam angin hawn theih a ni ang. Dawrkaite hian hand sanitizer, anmahni dawrtute hman tur dahin social distancing an zawm tha tur a ni. Tin, anmahni dawrtute hming, veng, phone number leh an rawn dawr hun ziah luhna register siamin dawr neitu ten an ziak lut vek tur a ni.

5. Essential commodities dawr hawn phalsak te hi (damdawi dawr tiam lovin) tlai dar 5:00-ah khar vek tur a ni.

6. Zirna in, training institute leh sakhaw biakna hmunte chu khar chhunzawm zel a ni ang. Aizawl municipal area chhunga undergraduate leh postgraduate examination (off-line) te pawh thulh rih a ni anga, online examination erawh chu kalpui a ni ang.

7. Mitthi vuina-ah mi 50 aia tam punkhawm khap a ni. Mitthi vui chungchangah chhiatni/thatni chungchanga Order ni 13.08.2020 a chhuah khauh taka kenkawh tur a ni ang.

8. Aizawl municipal area huamchhunga chengte phalna nei lovin tumahin mahni in leh compound an chhuahsan tur a ni lo. Hei hian a hnuaia mite leh an veivahna motor a huam lovang:

a) Heng Department hnuaia Sawrkar hnathawkte office kal leh haw.

b) Health Department-a thawktu te, Home Department leh a hnuaia thawktu - Police, Home Guards & Civil Defence, Fire & Emergency Services, Prisons-te, Disaster Management & Rehabilitation, Food Civil Supplies & Consumer Affairs, Civil Aviation, Excise & Narcotics, Mizoram Legislative Assembly Secretariat, State Election Commission leh Village Council/ Local Council inthlan buatsaihna kaihhnawih office-a thawkte leh PWD/PHE/P&E Department-a essential services bik.

c) COVID-19 duty Sawrkar hnathawk a chunga tarlan tel loh leh Local Level Task Force member leh volunteer-te.

d) Medical leh veterinary emergency duty leh hospital-a thawkte.

e) Mizoram Kohhran Hruaitu Committee member-te.

f) Bank, ATM, postal, telecom service provider leh Food Corporation of India-a hnathawkte.

g) Information & Public Relations Department hnuaia COVID-19 duty-te, print & electronic media, cable leh internet services a thawkte.

h) Bawnghnute sem leh bawlhhlawh paih hna thawktute.

i) Petrol pump leh LPG delivery a thawktute.

j) Courier, home delivery leh e-commerce service-te.

k) Private security service-te.

l) Airport atanga thlawhna a 10 haw quarantine tur buaipuitute.

m) Mizoram University hnuaia post-graduate online exam buaipuitu faculty member-te.

Heng zawng zawng te hian anmahni nihna ti chiangtu photo identity card an keng ngei ngei tur a ni.

9. Pawn (dawr/office/damdawiin/vantlang hmun) chhuak tur reng reng chuan (face mask emaw hmanraw dang hmangin) hmai an tuam ngei tur a ni.

He thupek zawm lo chu Disaster Management Act, 2005 Section 51 atanga Section 60, The Mizoram (Containment & Prevention of COVID-19) Ordinance, 2020 Section 5 leh IPC Section 188 hmangin hrem theih an ni. Sawrkarin heng thuchhuah a siamte hi a tul dan azirin a ennawnin a tidanglam thei ang.