Vawiin khan DC Pisa-ah Aizawl DC Pu Shurbir Singh IAS hovin District Disaster Management Authority (DDMA) chu an thukhawm a. He meeting-ah Aizawl SP, DDMA member te, Department hrang hrang aiawhte, CYMA aiawh, Special Invitee (Department thenkhat te) leh Assam Rifles, BSF leh CRPF aiawhte an tel.

Aizawl DC chuan MDDA chu Aizawl khawpui tan a pawimawh thu sawiin chhiatna laka inven nan, a hmun hma te enfiah a, ruahmanna siam leh mipui te hrilhhriat a tul thu te a sawi. Meeting chuan Aizawl leh a chheh velah leimin leh leitlakhniamna hmun chhungchang te an sawiho, hmalakna leh ruahmanna siam dan tur an sawiho bawk. Heng hmun tam tak ah hian Quarry leh lunglak avanga leimin  thin chu meeting chuan a ngaimawh a, mipui himna ngaihtuah in, member te chuan dan lek kawh a tha an tih thu an sawi.  Durtlang-Bawngkawn Road leh Bawngkawn-Thuampui Road inkarah insa mek te leh insakna tura laihlai te chu ADA nen tang hova mipui himna atan enfiah a tul thu meeting a hian sawi a ni.
Aizawl DC chuan District Disaster Plan siam mek a nih thu  sawiin chhiatna laka inven nan Department hrang hrang te nen tun aia thawhhona tha nei a tul thu a sawi bawk a ni.