973/2024-2025

Aizawl, 27.06.2024: Aizawl District chhunga AIDS natna laka invenhimna leh do kawnga hma la tura din DAPCC (District AIDS Prevention and Control Committee) chu vawiin khan an Chairman, Aizawl DC Pi Nazuk Kumar hovin DC Office Conference Hall ah an thukhawm.

He meeting-ah hian zirlai tleirawl tan tir (adolescents) zinga AIDS chungchang inzirtirna leh inhrilhfiahna mumal tak neih a nih theih nan a hmalakna pakhat - Adolescents Education Program (AEP) kalpui a nih dan thlirletna leh sawihona neih a ni a. He AEP hmalakna hnuaiah hian March atanga May thla, 2024 chhung khan school 177 atangin zirtirtu 332 te tan training pek a ni a. Heng school te hi Aizawl East CMO huamchhunga school 95, Aizawl West CMO huamchhunga school 78 leh Mamit district-a school 4 te an ni. DAPCC ruahman angin DAPCU (District AIDS Prevention and Control Unit) team te, SCERT Project Coordinator te leh Aizawl District Education Officer tangkawp in training hi an buatsaih a ni. Vawiin meeting-ah hian zirtirtu training pek tawhte hian a taka an school theuh ah AIDS chungchang inhrilhrhiatna hi an kalpui ngei theih nan a hmalak dan tur an sawi bawk.

Aizawl DAPCC ah hian Sr. CMO Aizawl West chu Vice-Chairman niin, District AIDS Control Officer chu Member Secretary a ni a. AMC Mayor, CMO Aizawl East, Civil Hospital Med. Supdt., District TB Officer, DEO, DIPRO, Aizawl East leh West NHM a Dist. Programme Manager te, District RCH Officer, Kulikawn ART Centre Medical Officer te, Dist. Programme Manager, DAPCU leh community representative pakhat an tel a ni.