Vawiin khan Aizawl DC Dr. A. Muthamma hovin kumin inthlanpuia  hman tur Electronic Voting Machine (EVM) leh Voter Verifiable Paper Audit Trail (VVPAT) endikna hun ‘First Level Checking of EVM and VVPAT’ DC Conference Hall-ah neih a ni a. He hunah hian Political party hrang hrang aiawh te leh Aizawl DC Election staff te an tel a ni. EVM ballot unit 495 awmin VVPAT 440 leh Control Unit 440 a awm a. August Ni 20-27 chhung endikna hun hi neih tur a ni. Khawlte hi an dahna hmun Strong room atangin lakchhuah an nih hnuah endik an ni a, Mock poll neih niin khawl dahna room pawh endik a ni. Hemi bakah hian khawl hman dan tur inzirtirna leh inhrilhhriatna neih a ni bawk a ni. EVM hman tur hi M3 EVM niin Electronics Corporation of India Limited (ECIL) siam a ni a. Hyderabad atangin Guwahati thleng a siamtu ECIL hian phur chho a, Mizoram sawrkar hnuaia Election Department chuan Guwahati atangin District tin hman tur an la leh a ni.