No.7916/2020-2021

Aizawl, 25th March, 2021 : Republic Veng Local Council Member pakhat Pu Lalremtluanga, kum 48, chu ni 9.1.2021 khan vanduaithlak taka a boral avangin By-election neih a ni dawn a, hemi atan Summary Revision of XVII/2 Republic Veng Local Council Electoral Roll buatsaih a lo ngai ta a. Republic Veng Local Council By-election chungchang sawiho leh thurel turin vawiin khan Aizawl D.C. leh District Municipal Election Officer ni bawk Dr.Lalhriatzuali Ralte hovin DC’s Conference Hall-ah Local Level Standing Committee an thukhawm.

Meeting kaihruaitu Aizawl D.C. Dr.Lalhriatzuali Ralte chuan MLA roll leh Local Council roll hi a hran a nih avangin MLA roll-a awm tawh si, Local Council roll-a hming la chuang ve lo awm theih a ni a, chuvang chuan Republic veng mipuiten he draft roll hi uluk taka an en theihna turin LLO-ah te electoral roll copy dah a ni ang tih a sawi a. A tam leh zau thei ang berin puanzar a, electoral roll felfai tak neih a nih theih nan a kaihhnawih official-te, political party zawng zawng te, NGO te leh media ten theihtawp chhuahpui ve turin a sawm. Aizawl District Municipal Election Officer ni bawk Dr.Lalhriatzuali Ralte chuan XVII/2 Republic Veng Local Council Electoral Draft Roll a tlangzarh nghal a ni.

Republic Veng-ah hian Polling Station pathum a awm a, chunga voter dinhmun chu hetiang hi a  ni: Republic I-ah 1184, Republic II-ah 1076 leh Republic III-ah 857 (Total : 3117). Polling Station pahnih - Republic I & II - chu Community Hall-ah dah a ni ang a, Republic III erawh Govt. Primary School-ah a awm thung ang.

State Election Commission chuan electoral buatsaihna hun atan hetiang hian hunbi a siam :

Publication of draft roll : 25.3.2021

Submission of claims & objections : 26.3.2021

Disposal of claims & objections : 27.3.2021

Publication of final roll : 31.3.2021

Qualifying date chu ni 1.1.2021 a ni a, hemi nia kum 18 tlingte, Local Council draft roll-a hming chuang si lote tan roll-a inthun thar hi dil theih a ni ang.