No.4291/2021-2022
Aizawl, the 16th March 2022: Vawiin khan Aizawl DC Dr Lalhriatzuali Ralte hovin Taxation Department Auditorium-ah Swachhata Pakhwada hun hman a ni a. Thupuiah vawikhat chauh hman theih Single-Use Plastic hman tlem inzirtirna “Curb the use of Single-Use Plastic and Discourage the use of Plastic in the Office” tih chu an hmang a ni.

Aizawl DC Dr Lalhriatzuali Ralte chuan plastic hmang tlem tura mitin te sawmin, mahni mawhphurhna leh tihtura dah a, mahni atanga bul tan theuh turin a sawm a, nasa lehzuala mahni in, office leh awmna hmun theuhah single use plastic hmang tlem turin a ngen. Vawiin programme an buatsaihah pawh ei leh in tur semna hmanrua atan plastic hmang loa tawihthei chi leh glass an hmang nghal chu lawmawm a tih thu DC chuan a sawi a ni. Sensitization leh awareness zau taka kalpui tul a tih thu sawiin Dr Lalhriatzuali Ralte chuan school naupangte zingah zirtirtute kaltlangin plastic that lohzia inzirtira bul tan a rawt a. Mizoram chhunga kohhran hrang hrang leh tlawmngai pawl hrang hrangte nena thawk hovin zau zawka zirtirna kalpui tul a tih thu DC chuan a sawi bawk a ni.

India ramin faina kawngah chak zawka hma a sawn zel theih nan Swachh Bharat beihpui thlak mek chu mipui mimir, khua leh tui zawng zawng ten an mawhphurhna a ni tih hriaa an tel tam leh zual theihna turin Swachhata Pakhwada hi buatsaih a ni a. He hmalakna hnuaiah hian Sawrkar Laipui chuan State te zawm turin tih tur hrang hrang a duang a. Kuminah hian webinar te buatsaih niin online a thupui inziaksiak (slogan writing competition) buatsaih a ni bawk a. Single Use Plastic mihringte tana a hrisel lohzia inzirtir a, environment tana thil pawi tam tak a thlen avanga hman tlem inzirtirna chu tun tum Swachhata Pakhwada ah hian kalpui a ni.

Plastic hi thil tangkai tak, mihring khawsak phunga bet tel tlat tawh a ni a. Amaherawhchu, a tawih ral theih ve loh avangin khawi hmunah pawh bawlhhlawh a siam nasa a. Ram tam takah chuan nasa taka buaipui tham khawpin plastic bawlhhlawh hi a inhnawh khawm tawh a ni. Mizoramah pawh luidungah leh hmun hrang hrangah plastic bawlhhlawh hmuh tur a tam em em tawh a. Plastic waste management hi Sawrkar chuan a buaipui mek a, a hmangtu mipuiin vawikhat chauh hman theih plastic tel loa khawsak kan thiam theihna tura inzirtir leh mumal taka thliar hrangin plastic kan hman te paih thin a tul zia inzirtirna kalpui mek a ni.

COVID-19 & Cleanliness tih thupui hmangin Slogan Writing Competition buatsaih a ni a. Baby Lalmuanawmi phuah “Fainain COVID-19 lo umbo ve rawh le” tih chuan pakhatna lawmman a dawng a. Pahnihna chu Irene C.Lalduhawmi ziak “Thianghlim la, COVID-19 hri lakah him rawh” tih niin pathumna chu K.Lalrinhlui phuah “Ngawi renga i nun suattu COVID-19 laka i lo him theih nan in leh a vel vawng fai rawh” tih a ni.

Vawiin program DC Office, Aizawl leh Women Helpline Mizoram te buatsaihah hian SDO (Sadar) Pi V Lalmuanpuii chu Chairman a ni a. UD&PA Deputy Director Pi Lalhruaitluangi, Women Helpline Mizoram Manager Dr Jennifer Rohlupuii leh AMC Enforcement Inspector Pu Vanlalthuama ten thu an sawi a ni.