No.1734/2021-2022 

Aizawl 8th August 2021: Kan hriat theuh angin Covid-19 hrileng vangin hun rei tak kan in kharkhip ta a, hrileng in ziaawm lam a la pan rih lo nachungin mipuiten harsatna tam tak kan tawh mek avangin loh theih lohna avangin Sorkar-in dul deuh zawka inkaihhruaina thar a tichhuak ta a nih pawhin hrileng hi a ziaawm ta a, kan inthlahdah thei tihna ni lovin, hri laka kan him nan mimal kan pawimawh zual ta hle tih a kawk a ni. Chuvangin a hma aia nasa lehzualin mitin te kan fimkhur a, Covid Appropriate Behavior (CAB) leh Sawrkar-in SOP a tihchhuah te zawm turin kan inngen thar leh tak meuh a ni. Chhungtin leh mimal tin te he hrileng laka kan him theihnan a hnuaia tarlan te hi zawm turin kan inhriattirin kan inngen a ni:

  1. Covid-19 vei te leh an chet tlat dan zirchianna in a tarlan chian em em mai chu chhungkuaa inkhung hrang lo te, tladah leh inlen pawh nasa ah hrikai/hri vei an tam ber a. Chuvang chuan he hri laka kan him nana pawimawh ber chu mahni chhungkua (in khata cheng ho) te bak inkalpawh loh hi a ni tih a chiang hle a ni. He hri laka chhungkua leh mimal kan himna tur chuan, khawhar zawk deuh pawhin midang nena inlenpawh lo a, midang nen a inban tawn lo a kan khawsak thiam rih a ngai ani tih i hre thar leh ang u.
  2. Loh theih loh a mahni inchhung atanga eizawnna avanga kalchhuah ngai te, office kai te pawh mahni hnathawhna hmun ah theuh fimkhur lehzual a nun hman ni se; mahni chawfun ken te, office ah pawh thawhpuite nen a thil eiho loh te inzir a ,fimkhur sauh sauh ni se. Tin, puipunna ah pawh loh theih loh thil a nih loh chuan kal loh rih te a tul hle bawk. Pawnchhuak apiang ten mahni ina haw veleh kut fai taka sil te, thawmhnaw thlak nghal thin te, pawnlam atanga bungraw lakluh reng reng tih thianghlim thin te chhungtin in i uar sauh sauh ang u.
  3. Chhungkaw member tin ten mahni inchhungah pawh hrikai kan awm loh na turin ei leh in buatsaih leh inpek kawngah fimkhur thar zel i zir ang u.
  4. Tun dinhmun a kan himna atana pawimawh ber pakhat chu vaccine lak hi a ni a, kan himna tur ani tih hre rengin chhungtin ten vaccine lak hi ngaihpawimawh theuh tur a ni. Chhungkaw mamawh lamkhawm a chhuak tur te phei chu a theih hram chuan Vaccine dose khat tal la tawh ni thei hram se a duhawm hle ani.
  5. Mask vuah dan tur dik taka vuah hi a pawimawh hle a, dik taka mask vuah thin te ah chuan hri inkaichhawng hi an tam lo hle ani tih mithiamten an hmuchhuak tawh a ni. Chuvang chuan mask vuah dan dik- mask thianghlim chauh vuah thin te, vawi khat chauh hman tura an siamchhuah vawi tam tak hman loh te, mask a thuah a vuah te, hnar leh ka phui taka khuh tir a vuah thin tur a ni. Tin, midang nena inbiak dawnah phei chuan mask hi vuah ngei ngei bawk tur a ni. Kutsilfai/tihfai ngun te, sanitizer hman te uar sauh sauh sauh zel ni se.
  6. Midang nena loh theih loh a awmkhawm chang pawha social distancing zawm (6 feet aia hnaia thut ho loh leh awmkhawm loh) thin tur a ni a, mask phelh miah loh a inbiak te leh hun rei lo thei ang ber zel awmho/thutho thin a tulzia te theihnghlih loh ni se.
  7. Tun dinhmunah hian naupang hrikai an awm chho ta malh malh a, chuvang chuan chhungkua a naupang neite chuan fimkhurpui lehzual tur a ni. Inkawmkhawm te, lenchhuah te khap tur a ni a, an kut ke fai taka enkawl bakah ei tur tha an taksa ti hrisel thei ei tur pek tam te a tul hle  a ni.  
  8. Covid-19 symptoms ni thei awm heng-khawsik, hritlâng, hrawkna, khuh, mit nâ leh adangte nei an awm anih chuan chhungkaw himna tur ani tih hria a a rang thei ang bera in test thin tur a ni a. Heng rinhlelhawm an awm anih chuan in test hma pawhin chhungkaw member dang te lak atanga inthiarfihlim nghal thin tur a ni.
  9. Hnathawk tur ruai tute chuan an hnathawkten Covid Appropriate Behavior (CAB) an zawm ngei theihnan an thlithlai reng tur a ni a, hri laka an hnathawktute an him theihnan a theih chin chin ah vaccine dose khat tal la tawh chhawr thin ni se. Tin, ei leh in inpek kawngah pawh hri a darh lohna turin ruahmanna (eitur insuah pawlh loh te, thleng leh no inhman tawm loh te) an siam thin tur a ni.
  10. Dawr nghaktu leh dawr tu te chuan mask tha takin, dik takin an vuah ngei ngei tur a ni a, dawr nei tu ten Covid Appropriate Behavior (CAB) zawm a nih ngei theihnan hma an la tur a ni.
  11. Commercial vehicles khalhtute pawhin mask vuah dan dik takin mask an vuah tur a ni a, sanitiser an pai reng tur a ni. Mihring in an khawih tam lai phei chu an kap thianghlim fo tur a ni bawk. Passenger-te pawhin mask an vuah reng bawk tur a ni.
  12. Covid Appropriate Behavior (CAB) leh SOP sawkar in a tichhuah te thuawih taka zawm tur a ni a, heng SOP leh CAB zawm lo te chu dan anga hrem zel an ni ang tih hre thar leh ila.
  13. Hri kai tamna veng /hmunah te leh CAB leh SOP zawm that loh na hmun a awm a nih chuan Deputy Commissioner in khuahkhirhna khauh zawkin a siam thin dawn a ni.

 

Mimal, chhungkua leh ram damna tur hi kan kutah a innghat ani tih theihnghlih lo in, kan himna tura thuchhuah awm te reng reng thuawih taka zawm zel turin mitin kan inngen a ni.