Vawiin khan DC Office, Aizawl ah Pu Kannan Gopinathan, IAS, Deputy Commissioner, Aizawl District hovin tunlaia kan thenawm State Manipur, Churachandpur District a natna chi khat Japanese Encephalitis (J.E) hrileng avanga School zawng zawng khar a nih leh thihpui hial an awm avangin meeting neih a ni a. He meeting ah hian Health Deparment atangin State Vector Borne Disease Control Programme (SVBDCP) te, Integrated Disease Surveillance Programme (IDSP) te, Aizawl East District Chief Medical Office atangte leh SDO (Civil), Sakawrdai atangte in thawktute an thukhawm a, he hrileng laka lo inralrinna tur leh hmalakna tur kawng chi hrang hrang an rel a ni.
Japanese Encephalitis (J.E) hi Mizoram in kan la hmelhriatloh leh kan ram a la awm ngailo natna a ni a, thosi chikhat ‘Culex thosi’ in a thehdarh deuh ber a ni. Thosi leh kan ranvulh thenkhat zinga mi vawk inkara inkaichhawn ni deuh berin, vawk bakah hian heng ran dang - bawng, lawi (cattle), ar (poultry) te hian an kai thei bawk a ni. Heng thosi te hian mihring an seh chuan mihringin he natna an kai chhawng ve leh thei a ni. He natna lanchhuah dan tlangpui chu khawsik sang tak a intan in, kaih, rilru lam buaina te leh awm hle hle theihlohna te leh hriatna tibuai zawngte in a langchhuak thin a ni. Heng damlohna nei te reng reng chu a rang thei ang ber a damdawiin panpui in hotute hriattir vat thin tur a ni.
He meeting in a hmalakna tur hrang hrang a chhawpchhuah tlangpuite chu:
1. Aizawl District leh Churachandpur District ramri-ah vawk, bawng, lawi leh ar te lakluh rihloh ni se.
2. A natna thehdartu thosi chungchang zirchianna neih theih a nihdan tur te.
3. JE natna finfiah theihna tur hmanraw pawimawh neih theih dan tur te
4. Ramri bul hnaia District leh khuaah te tun aia JE natna chungchang inzirtirna (Awareness) chak zawka kalpui dan tur te
5. Aizawl District huam chhunga Churachandpur District ramri hnaih a awm School zawng zawngah te inzirtirna pek ni se.
6. JE natna vei ni a rinhlelhawm reng reng damdawiin leh sawrkar hnena hrilhhriat zung zung a nih theih dan tur te.
7. Damdawiin tinah Doctor leh Nurse te tan JE natna enkawl dan tur mumal tak leh rualkhai taka kalpui a nih theih dan tur te
8. Mipuite thosi seh lak atanga invenna kawng hrang hrangte tun aia nasa leh zual a uar a nih theihna tur te
9. State Vector Borne Disease Control Programme (SVBDCP), Integrated Disease Surveillance Programme (IDSP) leh Chief Medical Officer (CMO), Aizawl East ten ngawrh leh zual a natna zawnchhuah hna leh hmalakna te uluk takin an vil chhunzawm ang.
10. He natna leh dinhmun zirchiang tur hian Health Department atangin thawktute a hmunah kalin zirchianna neiin enfiah a ni bawk dawn a ni.
Hemi chungchangah hian mipuite chu chi ai lo tur leh thosi seh laka inveng fimkhur turin a chah a, damloh thil thuah a rang thei ang ber a mithiamte hnenah inentir nghal zung zung turin kan inhriattir nghal a ni.
