Vawiin khan Aizawl District Deputy Commissioner chuan a hnuaia mi ang hian thu chhuah a siam.

Tun lai khawpui thang chho zelah mipuite, a bik takin naupang leh thalaite tan chawlh hahdama han intihhlimna hmun a vang tial tial a. Kan khawpui chhung lun laite phei chu lirtheiin a khat a ni deuh ber tawh a. Heti ang hi thil awm dan a nih chhoh zel avangin Aizawl District Administration chuan Aizawl khawpui chhungah lirthei kal vel tibuai lova mipuite tana intihhlimna hmun, hunbi nei deuha siam dan kawng tal a awm thei mahna tiin, vawiin chawhma khan Deputy Commissioner Office Chamber-ah meeting neih a ni a.

He meeting-ah hian Aizawl SP, Traffic SP, AMC aiawh leh DC Office-a senior officer-te an tel a. Meeting chuan he ngaihtuahna hi tihhlawhtlin theih ngei tha a ti a. A enchhin nan Zodin Traffic Point leh Dak inpui kawng peng thuam inkar hi a thlang chhin a. Addl. DC Pu Lalhmunsanga Hnamte kaihhruaiin Aizawl South SDPO, Traffic DSP leh Traffic OC te’n a hmunah kalin an lo zir chiang phawt ang a, a tul anga la ngaihtuah chhunzawm leh a ni ang.

Ruahman chhin dan chuan kar tin inrinni chawhnu atangin he lai kawng hi “No Vehicle Zone”-ah puan a ni ang a; chumi chhung chuan cycling, roller skating, dancing, music leh advertisement programme atan te hman tangkai theih a ni dawn a ni. Hemi chungchanga rawtna nei duh tan DC Office-ah emaw Traffic SP Office-ah emaw ziaka thehluh theih a ni e.