Nimin (25.8.2016) khan Aizawl District Advisory Committee on Youth Programme chu an Chairman Aizawl DC Pu Kannan Gopinathan hovin a pisaah an thukhawm. Kumin 2016-2017 chhunga Nehru Yuva Kendra Sangathan (NYKS), Aizawl District-in a hmachhawp programme hrang hrang leh chumi atana sum hman tur ruahman te an thlir ho a. Kumin Sorkar kum kal meka an sum hman tur ruamhman zat chu Rs. 5,90,500/- a ni.
He meeting-ah hian District Youth Coordinator, NYK hnen atangin kum 2016-17 chhunga Annual Action Plan chhawpchhuah te kalpui dan tur leh mawhphurhna hrang hrang latu turte sawiho a ni a. NYK programme-te hi thalaite tihhmasawnna bakah Sorkar (State leh Central) hmalakna pui ber te inhrilhhriatna remchang a nih thu te sawilan niin, line Department-te nena thawh ho dan te sawi a ni.
NYKS hian a tum ber chu thalaite chakna, thiamna leh theihna te tihhmasawn a, khua leh tui tha, mi chhawrtlak a an chhuah theih nana hmalak a ni a. District level-ah chuan Youth Club hrang hrang ding te kaltlangin NYKS Programme te hi District Advisory Committee ruahmanna angin kalpui thin a ni a.
Eizawnna kawng kawhhmuh theih nana thiam thil hrang hrang inzirtir (skill development)-te, leadership training te, hmasawnna avanga hnam ziarang leh thiamthil te a ral mai loh nana Cultural event buatsaih te, Sports lama thalaite tihhmasawn te, hmeichhe dinhmun chawikan nana hmalak te a tel a. Kumin hian Youth Club 20 hnenah Sports Material (football, volleyball leh net) pek ani dawn a ni. Hmeichhiate tan skill development training pe turin course chi hnih - thla hnih awh leh thla li awh siam a ni bawk a. Club titha te hnenah District Level, State Level leh National Level thlengin lawmman buatsaih a ni bawk.
Tun dinhmunah Aizawl District atangin NYKS hnuaia club 500 (in register 268 leh register loh 232) an awm a. Mizoram pumah club 1683 (registered 955, register loh 728) an awm bawk. An zingah hian YMA, MHIP, Games & Sports Association hrang hrang pawh an tel a ni.
