313/2024-2025 
Aizawl, 19.04.2024: Mizoram aiawh a Lok Sabha a ding tur MP inthlanpui chu tukin dar 7 atanga tlai dar 5 thleng khan neih a ni a. Aizawl District ah chuan dar 5 thleng khan vote tla zat ECI Voter Turnout Portal atanga a lan danin Aizawl District tan 46.75% a ni (Vote tlak dan dinhmun chiang zawk hi tun dinhmunah a la hriat theihloh a ni.)
Aizawl District Election Officer leh district Bawrhsap ni bawk Pi Nazuk Kumar chuan Polling Station hrang hrangte a tlawh a. Mipui hnena thuchah sawiin inthlanpui atana duty zawng zawngte leh mipui vote thlak zawng zawngte chungah lawmthu a sawi a. Mizoram Parliamentary Constituency tana Returning Officer ni bawk Pi Nazuk Kumar chuan mipuiin an aiawh a Lok Sabha rorelna in a ding tur an thlan theih nan inpe taka Polling Party chu chu fakawm tiin, Polling station thenkhat chu a panna pawh khirhkhan tak tak a nih thu te a sawi a. Ram rorelna atana mipuiin kan hlutna, pawimawhna leh mawhphurhna kan hriat thar leh a, mipui rorelna 'democracy' vawnghim tur chuan vote thlak hi kan mawhphurhna pawimawh tak a ni tih vawn reng chu pawimawh a tih thu a sawi bawk.

Aizawl district ah hian Final E-roll atang a lan dan in a vaiin voter 2,88,268 awmin, mipa 1,34,820 leh hmeichhia 1,53,448 an awm a. Polling station 321 a awm bawk.

A vawikhatna atan pianphungha rualbanlo te enkawl Polling Station chu Govt. Combined Middle School, Zarkawt ah siam a ni a. Model Polling station pahnih leh Unique Polling Station pakhat siam a ni bawk a. Heng hmunah hian Mizoram Scouts & Guides te chu duty in, kum upa leh taksa lama harsana neite chu a tul angin an lo pui a ni. Anni bakah hian Chief Medical Officer te kaihhruaina hnuaiah polling station hrang hrangah a tul anga medical assistance pe a duty tur mi 32 an intir bawk a ni.

Vote thlak a zawh hnu hian polling party te hian vote thlakna khawl te hi Receiving Cente hmun thum - DC Office, Assembly Secretariat Annexe building leh Govt. Aizawl College, Sikulpuikawn ah te kalpuiin, heng hmun pathum a strong room ahte chuan EVM leh VVPAT te hi vote chhiar hma chu venhimna hnuaiah dah that an ni ang.

Attachment

  • Loading attachment...