No.1871/2021-2022

Aizawl, 15th August, 2021: Independence Day vawi 75-na lawmna pualin vawiin khan Aizawl District Bawrhsap Dr.Lalhriatzuali Ralte, IAS chuan Govt.Complex, Luangmuala State Senior Citizens Home leh Hunthar Veng-a State Social Welfare & Rehabilitation Centre te a tlawh a, Independence Day chibai bukin thilpek te a hlan a ni.

State Senior Citizens' Home ah hian kum 60 chin chunglam mi 8 leh special case in kum 60 hnuai lam mi 1, an vaiin mi 9 an awm mek a. He Home hi Old Age Home tih hming puin Mission Vengah mi in luah hawhin kum 1989 a din tan a ni a. Chumi hnuah Durtlang lamah insawn lehin tuna an awmna, Govt.Complex ah hian kum 1996 atangin an awm tan a. Tunah hian thawktu mi 9 awmin department building changtlung takah awmhmun nghet neiin an awm tawh a ni. Home din tirh atangin mi 72 enkawl an ni tawh a, chumi zinga mi 32 chu an boral tawh a ni.

Hunthar Veng-a State Social Welfare & Rehabilitation hi zu leh ruihtheih thila harsatna nei hmeichhiate enkawl na hmun atan kum 1990 October ni 8 khan din a ni a. Tunah chuan department building tha tak neiin hmunhma changtlung takah harsatna hrang hrang tawk hmeichhiate, nunphung pangngai an neih leh theihna tura enkawl na hmun pawimawh tak a ni.

Centre ah hian eizawnna atana thiamthil chi hrang hrang - Tailoring, Handloom, Beauty Culture leh Computer(BCC) zirna accredited centres kalpui a ni a. Hemi bakah hian rilru, taksa leh thlarau nun siamtharna leh tihchakna turin couselling leh thil dang te pawh hunbi mumal taka neia buatsaih reng a ni bawk. He Centre ah hian a din tirh atangin mi 917 enkawl an ni tawh a. Heta tanga chhuak tawhte zingah hian pasal fanau te neia, chhungkaw pangngai tak din ta te, zirna leh eizawnna kawng ah pawh hlawhtling ziktluak, mi thahnem tak an awm tawh a ni.

A campus chhungah vek hian hmeichhe naupai te leh kawng danga harsatna tawk, hmun dang pan tur hre lo te tan engtik hunah pawh pan theih, Swadhar Greh a awm a. Engtik hunah pawh a pantute an lo dawngsawng thei reng a ni. Rehabilitation Centre leh Swadhar Greh ah hian an vaiin mi 40 an awm mek a ni.

He Centre hi Mizoram sawrkar, Social Welfare Department hnuaia mi ni mah se, heta enkawl hmeichhe rahbi tleu tawh te hamthatna tur leh Centre tih changtlun chhoh zel nan sawrkar department dangte leh NGO te nen thawhhona tha tak hnuaiah training Centre te hi kalpui a ni a. Kohhran, Pawl leh mimal pawh, he Centre tih hmasawnna tur leh a chhunga chengte tanpui duh tan zau takin an inhawng a ni. He Centre chhunga Library tan lehkhabu donate pawh an dawng thei reng a ni.

Aizawl District Bawrhsap Pi Lalhriatzuali chuan Rehabilitation Centre a enkawl mek hmeichhia te chu mi puitling leh rintlaka inchher chhuak vek turin rilru insiam thar a, tan la sauh sauh turin a fuih a. Centre changtlung tak nei thei tura thawktute inpekna leh thawhrimna chu ropui a tiin lawmthu a sawi a ni.

Independence Day lawmna pual hian Aizawl District Bawrhsap Pi Lalhriatzuali bakah D.C. Office hnuaia Officer dangten Home leh Centre hrang hrang - Centre for Peace & Development, Saron Veng; Special Blind School leh Hermon Children's Home, Durtlang; Friends of Children leh Khawngaihna In, Chaltlang; Bethany Children's Home Sihhmui; Muanna In, Mualpui leh Hmangaihna Run, Zemabawk te tlawhin thilpek an hlan bawk a ni.