No.2708/2021-2022

Aizawl the 25th October, 2021 : Vawiinah khan October ni 11 a, Health Department Minister Dr. R.Lalthangliana hova lo rel tawh angin Aizawl District chhungah All Mask Campaign chu Aizawl Bawrhsap Dr. Lalhriatzuali Ralte in Aizawl DC Complex -ah hawnna hun a nei.

He hawnna hunah hian Aizawl Bawrhsap Dr. Lalhriatzuali Ralte chuan Aizawl District chhunga Mask hman uar lehzualna programme hawnna hun hman a ni thei chu lawmawm a ti a. Mask vuah that hi invenna hautak lo ber leh sawrkar thuchhuah awih hi kan damna leh himna tur a ni tih hre thar leh turin Aizawl District mipuite a ngenin a sawm a. Covid-19 in Mizoram a nuai tirh atangin mitin te kan buai a, sawrkar pawhin theihtawp chhuah in SOP hrang hrangte chhuahin order te chhuah a ni thin ah, chung zawng zawngah chuan mipui, VLTF leh LLTF ten sawrkar an thlawp tha em am a ni, a ti a. VLTF leh LLTF ten an nunna thapa an hun hlu tak senga engtik lai pawha an duty thinna rah chuan kawng tam takin sawrkar a chhawk a, Aizawl District huam chhunga task force member pathum in an nunna hial an chan chu a tawrhpui tak zet zet a ni, a ti a. Covid-19 hripui len lai hian zirchhuah tur- thuawihna, tanrualna, thawhhona pawimawzia hre thar leh ila, tanrual hi chakna a ni tih hre nawn leh ila, thil hlui hnuchhawnin, rilru thar pu in rahbi thar in tuk leh teh ang u tiin mipuite a sawm a ni.

Dr. Lalhriatzuali Ralte chuan mask hman that bakah vaccine hi hri laka kan dam khawchhuahna kawng khat a ni tih hre thar leh ila, sawrkar in symptomatic approach a hman mekah hian mipui inthlahdan lo ila, khawvelin Covid-19 a hriattirh-a mithiamten invenna a tana pawimawh an tih- mask hman that, inhlat a midangte nena awm, kut silfai that te hi vawiin ni thleng pawh a la ding reng a ni tih hre thar lehin zawm zel turin a sawmin a ngen a ni.

He hun hi Additional DC Pi K.Vanlalruati’n a kaihruai a, Aizawl City Local Council Association, Joint NGO leh MKHC member mi 12 hnenah chawimawina lehkha leh thilpek hlanna hun hman a ni a. SDO Pu Lalvenhima chuan lawmthu sawiin he hun hi a khar a ni.

All Mask Campaign hawnna hman zawhah hian au rinna hmangin mipui hnena zirtirna Treasury Square-ah kalpui nghal a ni a, mask vuahdan dik, mask hman pawimawhna, mask fai hman pawimawhna leh lo theihloh a mi in a kal pawha mask hmang zel tura mipui ngenna leh nu leh pa ten inchhungah mask hmang uar zual tura tu leh fate hrilh tura ngenna te Aizawl Bawrhsap bakah ACLCA President leh Joint YMA aiawh ten an nei nghal bawk a ni.

All Mask Campaign atan hian Department hrang hrang Home, Excise & Narcotics, Health, I&PR ten nen Flying Squad Team din a ni a, hmun lun lai-ah mask vuah pawimawhna leh mask hmang tha tura inzirtirna kalpui a ni ang a. Campaign denchhen hian Aizawl District chhunga BDP te hnenah an bial chhunga mask hmang uar tura ngenna leh hriattirna thawnchhuak tura tih an ni a. Veng hrang hrangah VLTF, LLTF ten information mic hmangin mipui zirtirna an kalpui ang a. DIPR, CMO te nen tangkawp in Street Preaching Programme hman a ni dawn bawk a ni.