No.1652/2021-2022
Aizawl the 1st August, 2021 : Vawiin khan Chief Minister’s Relief Fund thawh lina chu COVID-19 hrileng dona kal zelah inkharkhip vanga chhuanchham chhungkuate hnenah Aizawl DC chuan a sem chhunzawm. Tarlan tawh angin Aizawl Municipal Corporation (AMC) huam chhunga cheng chhungkaw 9750 hnenah tanpuina sum hi Rs 1500 (Cheng sangkhat zanga) zela sem a ni.
Mi inphal ten thahnemngai takin khawsak harsate tanpuina turin Chief Minister's Relief Fund-ah sum an chhung lut zel a. CMRF sem dan ngaihtuahtu Committee chuan a sem dan tur rang takin a ngaihtuah zung zung a. Khawtlai awm lovin DC tinte hnenah sum hi pek chhuah nghal zel a ni. Aizawl DC chuan CMRF atanga sum lo kal te hi LLTF kaltlangin a semdarh zel a. Vawiin Pathianniah pawh chawlh awm lovin CMRF atanga sum lo kal te hi a sem chhunzawm zel a. Sum dawn chin hi vawiin lamah sem zawh hman beisei a ni
