3848/2024-2025

AIZAWL; the 17^th January, 2025:  Vawiinah khan Pu Rex Zarzoliana Vanchhawng, Superintendent of Police, Aizawl office chamber-ah Aizawl District Crime Review Meeting, 2025 neih a ni a. Meeting hi SP  Pu  Rex Zarzoliana’n  kaihruai nghalin, Aizawl District chhunga Sub-Divisional Officer (SDPO) te, Dy SP (Prosecution) leh Aizawl khawpui chhunga Police Station hrang hranga Officer-in-Charge te an tel a ni

He Crime Review Meeting-ah hian kum kal ta 2024 chhunga Aizawl District a crime chungchang te, Aizawl DEF hnuaia Police Station hrang hrang hnuaia thubuai ziahluh bakah dan leh thupek kenkawh chungchanga Aizawl District Police-te hmalakna hrang hrangte thlirlet niin, kum 2025 a dan leh thupek kenkawh leh misual hnuchhui kawnga hmalak dan turte sawiho a ni.

Kum 2024 chhung khan Aizawl DEF hnuaia Police Station hrang hrangah thubuai (case) 1460 ziahluh a ni a. Aizawl Police Station-ah thubuai ziahluh tam ber niin thubuai 489 ziahluh a ni. Heng thubuai ziahluh zawng zawng atang hian Case 712 (48.77%) chu chhuichhuah niin Chargesheet tawh a ni a. Chhui mek Case 404 a la awm bawk. Tin, kumthar 2025-ah January ni 15 thleng khan Case 104 ziahluh tawh niin chung zinga Case 57 te chu chhuichhuah (detect) tawh a ni bawk

He Review Meeting-ah hian Pu Rex Zarzoliana Vanchhawng, SP Aizawl chuan kalkhawmte chu mahni hna leh mawhphurhna tha taka hlen zel turin taima tak leh inpekna tak tak nen a thawk turin a chah a. Dan leh thupek kenkawh kawngah dan ang zel a kal a pawimawh thu sawiin mipuite himna ngai pawimawh turin a chah bawk. Hnuchhui (investigation) kawngah tun aia inchher hriam a pawimawh thu leh thilsual titu ten dan hnuaiah an phu tawk hremna an hmuh ngei theih nan a hnuchhui kawnga tan la thar turin a chah bawk.