No.3859/2021-2022
Aizawl, the 1st February 2022 : Nimin khan District Level Fire Prevention Committee, Aizawl District chu an Chairperson Dr.Lalhriatzuali Ralte, Deputy Commissioner, Aizawl District hovin Environment Forest & Climate Change Department Conference Hall-ah an thukhawm.

He meeting-ah hian nikum lama Aizawl District chhunga kangmei chhuah dan te thlirlet a ni a. Pu Laltlanhlua Zathang, IFS, Member Secretary & DFO, Aizawl Forest Division chuan nikum 2021 khan Aizawl district bikah, Forest area chhungah kangmei vawi 10 a chhuah thu leh, Forest area pawnlamah vawi 266 a chhuah thu a sawi a. Aizawl chhehvelah kangmei lian tham tum 6 lai - Sakawrhmuituai, Reiek tlang, Muthi khaw hnuai, Zokhawsang leh hmun dangah te kangmei a chhuah thu sawiin, heng kangmeite hi lo hal atanga chhuak an ni deuh zel tih a report a ni.

Aizawl District Fire prevention Committee chuan lo hal ni hnuhnung ber atan 15th March ruatin, hemi hnu lama lo hal an awm chuan dan anga khauh taka hrem an nih theih nan hmalak ni se an ti a. Aizawl chhehvela lo leh huan vat te chuan an hal hmain thuneitute hnenah hriattir hmasain, kangmei a chhuah lohna atan thuneitute hriatpuina nen chauh lo/ huan hal ni se tiin an rel bawk. Mipui hnena zirtirna leh inkhaihruaina a zau thei ang bera kalpui ni se an ti bawk a ni.