Aizawl District Level Fire Prevention Committee chu vawiin chawhma dar 11:00 khan Chairman Pu J.Hmingthanmawia, Addl. D.C. hovin ama Office Chamber ah an thukhawm a, kum kaltaa kangmei ven kawnga hma lo lak tawh dan te thlirletin kumina State Level Fire Prevention Committee-in a lo rel tawh anga Fire Prevention Week hman dan tur leh a hawnna programme te an rel a, Fire Prevention Week hawnna hi ni 5th March 2013 (Thawhlehni) dar 11:00 AM ah Aibawk ah neih ni se ti-a rel a ni. Chalfilh Bial Bye Election avang leh rokhawlhna dangte avangin District Level Fire Prevention Committee hi kum dang aiin koh tlai hret a ni.

State Level Fire Prevention Committee lo rel tawh angin kumin hian ni 15 March 2013 aia tlai lova lo hal vek tura tih chu tha taka zawm a nih theih nan Aizawl District chhunga khaw tin te chah nawn theuh ni se tih te, Aizawl District huam chhunga kangmei ven kawnga hma la tha khaw pathum thlanchhuah dan tur leh lawmman pek dan tur te an rel bawk a, a endik dan tur ruangam leh endiktu turte an ruat nghal bawk. Endiktu te hian ni 15 April 2013 hma-in District Level Committee ah report thehluh vek ni se an ti. Kum hmasa lama lo tih thin angin kangmei ven kawnga mipui inzirtirna Awareness Campaign pawh ni 4-8 March 2013 chhunga khaw hrang hranga neih turin programme an duang nghal bawk a ni.

Aizawl khaw daia kangmei veng tur hian Environment & Forests Department chuan Fire Watcher engemaw zat tunah hian a ruai mek a, Fire & Emergency Services pawhin Transport Office, Chaltlang ah leh Governor chenna Raj Bhavan ‘N’ Gate bulah Mobile Fire Station an hung bawk a, mamawh hunah koh theih reng an ni.