Vawiin khan Aizawl District Road Safety Committee chu an chairman Aizawl DC Pu Kannan Gopinathan hovin DC Conference Hall-ah an thukhawm. He committee hian Aizawl District-ah Road Safety chungchanga hmalak dan tur hrang hrangte an rel a ni.

Meeting-ah hian District Road Safety Action Plan buatsaih chungchangte, State Road Safety Policy kalpui dan tur te sawiho a ni a. Kawngpuia chhiatna tam tak hi vanduai vang liau liauva thleng awm thin mahse fimkhur lohna leh ngaihthah vanga thleng a tam em avangin nasa zawka inzirtirna leh inhrilhhriatna neih a pawimawh thu tarlan a ni a. Tha zawka hma lak a nih theih nan lirthei accident thlen tamna hmun (accident prone areas/ black spots, etc.) bik te chhinchhiah a, hmalak zui dan tur ngaihtuah nise tia rel a ni bawk.

District Road Safety Committee hi Mizoram sawrkar chuan Section 215 (3) of the Motor Vehicles Act, 1988 behchhana a din a ni a, District Deputy Commissioner chu Chairman niin District Transport Officer chu Member Secretary a ni a. Police, AMC, PWD, Medical, Education, I&PR leh Excise & Narcotics Department atangin member ruat an ni.