Vawiin tlai khan DC Conference Hall-ah Aizawl DC Dr. A. Muthamma kaihruaina hnuaiah Aizawl District Sanitation Implementation Committee an thukhawm.
Dr.A.Muthamma chuan Aizawl district faina kawnga hma a sawn lehzual theih nan nuai 27.80 dah hran a ni tiin hei hi NEDP hnuaia UD&PA component pakhat niin Aizawl DC kaihruaina hnuaia kenkawh tur a ni, a ti a. Hmalakna tur hrang hrang a awm a, chungte chu Aizawl district chhunga tui luan kawr leh lui thenfai leh cheithat te, faina chungchang zirtirna veng hrang hranga phochhuah te, mipuiten faina lama hmalam kan pan theih nana zirtirna leh inhrilhhriatna neih te, vantlang faina atana beihpui thlak te a ni, a ti.
Meeting-ah hian Aizawl district chhunga tui luan kawr leh veng thenkhat tihfai ngai zual thlan chhuah a tul thu te, tui luan kawr te chu tihfai bakah chei that thlengin hmalak a ngaih thu te sawiho a ni a. Department hrang hrang, AMC, NGO tihtur theuh siam rem a ni a. July thla tawp emaw August thla tir lama Aizawl District chhunga faina beihpui thlak tum a nih thu rel a ni.
He hunah hian DC hnathawkte, AMC, PHE, I&PR, DLAO, SDO (Civil) Saitual, UD&PA, MUP aiawhte an tel a ni.
