26/2025-2026

AIZAWL; the 3^rd April, 2025: Vawiin khan Aizawl DC Pisapui Hall-ah District Agricultural Marketing Committee (DAMC), Aizawl district buatsaihin Aizawl District chhunga sawhthing Secondary Collection Centre (SCC) puipa te tan training buatsaih a ni a. Aizawl DC leh DAMC chairman ni bawk Er.Lalhriatpuia, IAS chuan Training hi a kaihruai a ni. DAMC chairman chuan Aizawl District huam chhunga SCC  panga(5)-a puipa kalkhawm te fuihna thuchah sawiin, kan hmalam hunah SCC enkawl leh buaipui chu an kutah a la tlak tawh dawn avangin harsatna tawk lova, tha taka SCC an enkawl theih nana training hi buatsaih a nih thu sawiin, trainee te chu  bel taka an thiam a, an hriatchian theih nan rilru pe taka training tur leh an hriatchian loh thil te chu Trainer te zawh hreh loh tura chahin, duhsakna a hlan hlawm.

Vawiin training-ah hian Pu Lalengliana, DAO Aizawl & Member Secretary, Aizawl DAMC chuan report tawi peiin,  report a tarlan dan chuan Aizawl District huamchhunga sawhthing lei nan Sawrkar tangin Procurement Fund Ist installment-ah cheng nuai ₹187.50 leh 2^nd Installment-ah cheng nuai ₹187.50, a vaiin cheng nuai ₹ 375.00 dawn tawh a ni a. He Fund atang  hian cheng nuai ₹138.087 man sawhthing 2761.74qtls lei tawh niin, cheng nuai ₹236.913  balance a la awm a. Aizawl district huam chhungah sawhthing 26,759qtls lei tur la awm thei tura beisei a ni. East pahileng leh Thingsulthliah SCC a sawhthing 341.82qtls (185.84+155.98) chu Karnataka Spice Trading ten ₹20/Kg in an rawn chhang a, March ni 25 khan thawnchhuah vek tawh a ni.

Aizawl District chhungah Secondary Collection Centre (SCC) panga (5) a awm a. Heng SCC tinah hian a enkawltu tur President/Chairman, Secretary, Accountant/Manager leh Coordinator te ruat vek an ni a. Sawhthing hralh thawhhnihnaah hian SCC tin te hi mahni kea ding thei tura beisei an ni tawh dawn a. Chuvangin vawiin hian SCC enkawltu leh buaipuitute mawhphurhna leh tih tur a kimchang thei ang ber a zirtir an ni.

Vawiin training programme-ah hian Pu Lalnunpuia, MAMB Co-opted member, Pu SK Das, Dy.Registrar,Cooperation Dept. leh Pu Saidawla, Chairman, Sihfa M-PACS Ltd & Chairman, te chuan  zirtirna an pe a. Pu Zoramsiama Hmar, Addl.DC & Dy. Chairman, DAMC Aizawl chuan lawmthu sawinain vawiin Training hi a khar ta a ni.