No.6856/2020-2021

Vawiin chawhma khan Aizawl DC’s Conference Hall-ah Aizawl District Task Force on CoVID -19 Vaccination chu Aizawl District Bawrhsap Pu R.Lalramnghaka, Chairman, District Task Force on CoVID -19 kaihruaina hnuaiah an thukhawm.

Meeting-ah hian CoVID-19 Vaccine te a lo thlen huna Aizawl District chhunga Vaccine pekchhuah dan tur te, Doctor, Nurse leh Medical staff ten inpuahchahna an kalpui tawh chin te bakah mawhphurhna leh chanvo insem dan te thlir lawk a ni.

 Report kimchang tak District Immunization Officer (DIO), Aizawl East, District Immunization Officer (DIO), Aizawl West,  Chief Medical Officer, Aizawl East, Chief Medical Officer, Aizawl West  bakah WHO Official te hnen atangin ngaih thlak a ni a. Tun dinhmunah CoVID-19 Vaccine hi a rawn thlen hun tur sawichian theih ni rih lo mahse a lo thleng hnai tawh tura beisei a ni a. Ruahmanna awmsa ang chuan Healthcare Worker zingah pawh Damlo Enkawltute, Sample Latute leh CoVID Volunteer ten an dawng hmasa dawn a. Vaccine dawng hmasa tura thlanchhuahte list hi dahluh(upload) vek a ni tawh a ni. Healthcare Worker te dawtah hian Frontline Worker bakah mamawh zuala mithiam ten an ngaih ten an dawng leh tura ruahman leh phawt a ni bawk a ni.