North Eastern Region Capital Cities Development Investment Program (NERCCDIP) Project 2 atan vawiin ni 19 November, 2012 hian Government of India (GOI), North Eastern States 5 Mizoram, Tripura, Meghalaya, Nagaland leh Sikkim te leh Asian Development Bank (ADB) ten Loan Agreement leh Project Agreement an sign fel ta.

Project Loan amount hi state 5 te tan Rs. 509 Crores niin Aizawl khawpui tan bik Rs. 151.15 Crores a ni. Project 2-in a thawh tur te chu Aizawl Water Supply Distribution Networks tihchangtlunna tur leh Aizawl Sewerage and Sanitation (Tui chhia leh Zun leh Ek thli) lak khawmna siam leh thlitfim te an ni.

ADB loan sign a nih theih nana hmalakna tul leh pawimawh zawng zawng thawka a hun tak kan inpeih theih chhan chu kan officer te inpekna leh thawhrimna liau liau a nih thu UD&PA Minister Pu Zodintluanga chuan a sawi a. A sawi zelnaah minister chuan SIPMIU a thawktute inpekna leh Mizoram tana an thiamna leh theihna an sên chu fak tlak leh fak phu a ni a, he loan sign avang hian Mizoram khawpui ber Aizawl chu khawpui nuam zawk leh changkang zawkah kan hlangkai thei dawn a, Mizoram tan mellung pawimawh tak a ni, a ti.

Loan Agreement hi Pu Prabodh Saxena, Jt. Secretary, Department of Economic Affairs (DEA), GOI leh Pu Narhari Rao, Officer in Charge, Indian Residence Mission, ADB ten an sign a. Project Agreement hi ADB lam leh Pu Ahsutoh Joshi, Director, Urban Development, GOI leh Pu R.L. Rinawma, Principal Secretary, UD&PA, Government of Mizoram ten an sign a ni. Er. Valbuanga, Project Director, SIPMIU leh Officer dangten an tawiawm.