Home Minister Pu R.Lalzirliana kaihhruai Co-ordination Committee on Traffic Management chu vawiin khan Secretariat Conference Hall-ah thukhawmin Aizawl khawpui tawt lutuk tihziaawm dan tur an sawiho. He Committee ah hian Parliamentary Secretary Lt.Col. Z.S.Zuala chu Vice Chairman a ni a. Member-te bakah Finance Minister Pu Lalsawta leh Aizawl Municipal Corporation Mayor Pu PC Lalhmingthanga te chu sawm bik niin an tel bawk.

Traffic Management Committee thutkhawm hmasa in a lo rel tawh thlir letin meeting-ah hian hma an lak tawh dan tarlan a ni a. Taxi intlanchhawk kalpui mek niin taxi te hi group thum - A, B leh C ah thenin nitin a inchhawkin group hnih zel an tlan a. Tun thleng hian taxi 3502 in sticker hi bel tawhin group A ah taxi 1175, group B ah 1150 leh C ah 1142 an awm a. Lengpui Airport atanga service hi LP sticker belin 35 an awm bawk. Road Protection Squad ten kawngsir leh kawngpuia motor chhia ding reng leh park lohna hmun tura park-te chhinchhiah hna an thawk mek a. Lirthei lei leh hralha neitu hming inthlak chungchang pawh Motor Vehicle Act in a sawi anga khauh zawka kalpui niin DTO tin ten hma an la mek a ni.

Traffic Dan bawhchhiate pawisa chawi zat Compounding Fee Rate ennawn chungchanga rawtna awm tawh chu sawrkar laipuiin MV Act siamthaa dan thar Road Transport and Safety Bill, 2015 a buaipui mek avangin sawrkar laipui thu ngaihchan ni se, tiin Committee chuan a rel a. Aizawl khawpui chhunga traffic sign mumal leh mawihnai tak siam turin Urban Development & Poverty Alleviation Department chuan Aizawl Smart City project kaltlangin ruahmanna an siam mek a ni.

Co-ordination Committee on Traffic Management chuan Aizawl traffic jam tihrehna tur 5 point vision a siam a. October ni 1, 2016 atanga November ni 1, 2017 (ni 426) chhungin he vision hi tihhlawhtlin a tum a ni. Hemi hun chhung hian Aizawl khawpui chhunga kawng rualrem lo siam that hna thawh a ni ang a; electric ban, telephone hrui, tui connection line leh vantlang thil pawimawh dangte khawih a ngaih dawn avangin khawtlang hruaitute leh department te nen tanho tum a ni. He mi chhung hian lirthei chi hrang hrang neitute chuan lirthei dahna mumal (garage) an nei hman ngei tur a ni a. Sawrkar thuneituten lirthei dahna nei leh neilo te endikin an thlithlai reng dawn a ni. Aizawl khawpui chhungah public transport siamthat a ni ang a, men laia tlan thin te bakah zan dar 10 atanga zing dar 7 thleng service tur bik siam tum a ni bawk.