Aizawl khawpui veng hrang hranga cheng mipuiten ei leh bar kan tlakchham loh nan te, thlai thartuten tha taka an thlai thar an hralh chhunzawm zel theihna tur tein mumal taka vegetable supply chain siam chhunzawm tha tiin vawiin khan Commerce and Industries Directorate Conference Hall-ah Commercer and Industries Director Pu J.Hmingthanmawia hovin sawrkar mi pawimawhte an thukhawm.
Aizawl khawpui chu Zonal Officer pakhat theuh enkawlna hnuaiah zone-12 ah then ni se,tiin meeting chuan a rel a. Heng Zonal Officer te hian veng tina Local Level Task Force atangin an veng bil mamawh (demand) an la khawm ang a, Zonal Officer te hian Controlling Room siam thara Controlling Officer te hnenah an report ve leh thung ang. Controlling Officer pakhat zelin zone 3 zel an enkawl dawn a ni.
State pawn atanga thlai chawk luhte chu mipui hnen a thlen hmain COVID-19 Medical Operational Team ten a him theih nan ruahmanna lo siam se, tiin an rel a. Thei, thlai hnah leh thlairah mipuite hnena hralh chhuahna rate hi hlep awmlo, hloh awm lo (no profit, no loss)-a kalpui ni se an ti bawk.
Meeting ah hian Horticulture Director Dr.Elizabeth Saipari, MIZOFED Chairman Pu K.Laldawngliana, Horticulture, Commerce and Industries, I&PR officer-te bakah Central YMA leh Aizawl City Local Council Association Officer Bearers te an tel.
