No.2434/2021-2022

Aizawl, the 1st October, 2021: Aizawl khawpui chhunga veng fai result puanna hun chu vawiin chawhnu khan AMC Auditorium, Thuampui-ah neih a ni a. He programme ah hian Aizawl Mayor Pu Lalrinenga Sailo chu khuallian niin veng fai thlanchhuah te hnenah lawmman an hlan a ni.

Pu Lalrinenga Sailo chuan he intihsiakna hi vengchhung inhriattir lawkna awm lo a endik anih avanga a hlut bik thusawiin bawlhhlawh paih kawnga PPP Mode Aizawlin a kalpui mek hi India rama ti thaber zinga mi an nih thu a tarlang a. Vawk leh ar khuahkhirh a tul zia chungchang sawiin Mayor chuan Hrem hlauh vang chauha dan kan zawm chuan a daih rei lo a, faina kan duh avangin dan kan zawm a tha a ni a ti. Aizawl khawpuiah property tax kan pek tlem thu sawiin, Vaibelchhe 15 chuang kumtin khawnchhuak turin Central Sawrkarin min phut a, kan khawn chhuak theilo a nih chuan Central atanga pawisa kan dawn tur pawh kan dawng chhunzawm thei dawnlo a ni, a ti a. Aizawl khawpui a Property Tax tlingkawm hi vaibelchhe thum (3) vel a nih thu Mayor hian a tarlang a ni.

Pu Lalrinenga Sailo hian Aizawl a mihring siamchhawp chhiatna (man-made disaster) thleng fo laka kan him theihna turin lei-laih khuahkhirna dan hun reilote hnuah kenkawh a nih tur thu a sawi bawk.

India Independence champhaphak vawi 75-na LAWMNA (Azadi Ka Amrit Mahotsav) pualin Aizawl Municipal Corporation (AMC) chuan faina leh bawlhhlawh thliar hran kawnga inzirtirna ngawrh takin a kalpui a. A hmalakna tamtak zingah hian street campaign buatsaih te, Community/Public toilet (inthiarna) tihchangtlun te, AMC huam chhung Local Council 83 zinga Faina leh Thianghlimna kawnga Veng (Local Council) hma la tha thlan chhuah te, bawlhhlawh thliar hrang (Source Segregation) tha veng thlanchhuah te a tel a ni.

Aizawl veng fai berah Luangmual Local Council thlan a ni a, pahnihna ah Govt Complex Local Council thlan niin, pathumna lawmman hi Model Veng Local Council in a la bawk a. Lawmman dawngtute hian chawimawina thuziak bakah pakhatnain tangka fai Rs. 30,000, pahnihnain Rs. 20,000 leh pathumna in Rs. 10,000 an dawng a ni.

Naktuk October ni 2, 2021 hian Aizawl Local Council zinga bawlhhlawh thliar hrang (Source Segregation) tha ber result puanna leh Sanitation Worker te chawimawina hun Pu Tawnluia, Deputy Chief Minister hova neih a ni bawk ang.