189/2026-2027 

Aizawl, 17th April, 2026: Vawiin khan Institute of Advance Studies in Education(IASE), Republic vengah kar leh Tuesday( 21/04/2026)-a  General Election to Aizawl Municipal Corporation (AMC), 2026 neih tura Sector Officer leh polling personnel  te tan District Election Officer (DEO) &District Municipal Election Officer (DMEO) office, Aizawl District in Training a buatsaih. Vawiin Training hi Presiding Officer (PRO) leh Polling Officer (PO) te tan chuan a vawi thumna leh final a ni. 

Vawiin Final Training hi District Election Officer (DEO) leh District Municipal Election Officer (DMEO), Aizawl district ni bawk Er.Lalhriatpuia chuan tlawhin, trainees te fuihna thuchah a sawi. Er.Lalhriatpuia chuan Democracy ramah chuan Indona tih lohah chuan Inthlanpui hi ngaih pawimawh ber a ni thin thu sawiin; trainees te pawh Inthlanpui  pawimawh zia hretu vek an ni anga, AMC-2026 inthlanpui hi, inthlanna felfai, thianghlim, langtlang leh  tihsual awmlo( Faultless)  inthlanpui a nih theih nan theitawp chhuah turin Trainees te a fuih a. Final Training a ni tawh avanga, vawiin bak training hi a awm tawh dawn loh thu sawiin, hriatchian loh thil an nei chuan Master Trainer te zawh hre loh tur leh training chu bel taka thiam tum vek  turin a chah. Trainees te chu mahni inrintawkna nena an duty an hlen theuh theih nan an thil zir te an bel hle a pawimawh zia sawiin, tha taka an duty an hlenchhuah theih nan  duhsakna a hlan bawk.

Vawiin Training-ah hian Presiding Officers te chu Master Trainer: Pi Lalruatpuii Hnamte, MCS; Pi Esther Leihang, MCS; Pi Christina Lalmuanzuali, MSC; Pi F. Lanisai, MCS; Dr. Lalchamliani, MCS, Malsawmhriatzuali, MCS; Pu Ngurthansanga, MCS ten Poll Process & Election Forms, EVM (Theory & Hands-on) an zirtir a.

Polling parties te hi Master Trainer : Pu Obed Lalmalsawma, MCS; Pu Samuel Malsawmzuala, MCS; Pu Hmingmawizuala, MCS Pu Lalawmpuia, MCS; Pi Lalhriatpuii Phutin, MCS; Pu PC Lalrammuanpuia, MCS; Pu Lalrindika, MCS; Pu Lalthakima chhangte, MCS leh Pu VL Chaka Hmar, MCS ten an  zirtir ve thung.

Vawiinah vek hian Institute of Advance Studies in Education(IASE)-ah hian AMC,2026 inthlanpui atan a ruat Sector officer 8 te pawh Training pek an ni a. Training hi  Polling station 264 a duty tur,( reserve te nen) Presiding Officers, Polling Officers- I &II te bakah Sector officer ten an chhim a ni.