No.6363/2020-2021

Vawiin chawhnu khan Health & Family Welfare Minister Dr. R . Lalthangliana leh Home Minister Pu Lalchamliana te kaihhruaiin thutkhawm hmanhmawh (emergency meeting) SAD Conference Hall, MINECO-ah neih a ni a. He hunah hian Mizoram Kohhran Hruaitu Committee (MKHC) leh Joint NGO Coordination Committee hruaitute bakah Indian Medical Association aiawh an tel a, Chief Secretary Pu Lalnunmawia Chuango, Health, DM&R leh Home department hotute an tel bawk.

Meeting hian uluk taka Mizoram COVID-19 dinhmun an thlir hnu ah, Chief Minister Pu Zoramthanga remtihna la in Mizoram mipuite kan him zawk nan leh COVID-19 hri darh chak lutuk ven nan, naktuk October ni 27, 2020 zing dar 4:30 atanga November ni 3, 2020 zing dar 4:30 (kar khat chhung) thleng Aizawl Municipal Corporation huamchhungah lockdown (inkharkhip) an puang. Lockdown boruak azirin a tul anga hemi hnu lehzela kalpui dan tur pawh ngaihtuah that leh a ni ang. Hetih rual hian AMC huamchhung ni lo, Mizoram hmun dangah COVID-19 No Tolerance Fortnight khauh taka kalpui chhunzawm tur a ni.

Lockdown chhunga zawm tur inkaihhruaina pawh Disaster Management & Rehabilitation department hotuten an duang nghal a ni.

Vawiin meetingah hian tunhnaia Mizoram COVID-19 dinhmun report ngaihthlak a ni a. October ni 18, 2020 atanga nimin (October ni 25, 2020) thleng khan AMC area-a Local Council 83 zinga 45 ah COVID-19 positive 160 hmuhchhuah an ni a. October thla hma a positive hmuhchhuah zinga 15% chu symptom nei an nih laiin, October thla chhunga positive hmuhchhuah tawh zinga 33% chu symptom nei an ni. Tunhnai kar khat chhunga COVID-19 positive hmuhchhuah tamna veng te chu Zarkawt - 28, Dawrpui - 11, Zemabawk - 11, Chaltlang - 9, Khatla - 8 an ni a. Zirlai 28, zirtirtu 9 leh zirna ina thawk non-teaching staff 4 an positive bawk a ni. Damdawi in kaihhnawih (hnathawkte leh damdawi in pantute) positive 28 an awm tawh a. Chhungkaw member zinga inkaichhawng hi chhungkaw 18 an awm tawh bawk a ni.