Mizoram State Election Commission Chairman Pu C. Ropianga chuan Aizawl Municipal Council inthlan hun tur November 3 ruat anih  thu vawiin khan Aizawl PIB Media Centre ah thuthar lakhawm tute hma ah a puang ta. Election Commission Chairman in a puan dan chuan Municipal Council  inthlan turah  Oct ni 4 - 11, 2010 chhung hming pek  theih a ni ang a. October ni 12 ah endik niin October 14 thleng inhnukdawk duhte tan inhnuhdawh phalsak an ni ang a, inthlan chu November ni 3 zing 7:30 atanga tlai dar 4:00 thleng a ni ang. Vote tla te chu November ni 4 zing dar 8 atanga chhiar tan a ni ang.  Aizawl Municipal Council inthlan kaihhnawih zawng zawngte chu November 16 ral hma a zawh fel vek tur a ni. 

AMC inthlanna turah hian Ward 19 awmin chung zingah paruk - Ward No II,  IV, VI,  XI, XII leh XVII te chu hmeichhia tan zuah bik an ni. He inthlanna turah hian a pumpuiin vote nei thei 1,68,649 an awm dawn a,  Election Commission of India ta EVM te chu hman an ni ang.

Inthlan hun danga la tih ngai loh AMC inthlanna ah hian hmuh tur ah awm dawn a. Lawmman chi hrang hrang buatsaih an ni. Chung te chu inthlan buaipuitu Polling Party ti tha ber thlanna te; Inthlan kaihhruaina Model Code of Conduct kengkawh tha ber Ward thlanna te; Polling Station zinga vote tlak thatna ber leh vote thlak tu te zinga hmeichhia leh mipa upa ber te hnenah lawmman siamsak an ni dawn a ni.

Hetianga State Election Commission in AMC inthlan hun tur a puan tak avang hian inkaihhruaina dan Model Code of Conduct chu heng inthlanna in a huam tur chinah te hian kenkawh nghal an ni.

He hunah hian Pu C. Ropianga chuan State Election Commission website www.secmizoram.in chu a hawng nghal a ni.