2595/2025-2026

Dated Aizawl the 10th December, 2025 : December ni 9, Thawhlehni zan dar 7:00 khan Durtlang Leitan Branch YMA-te chuan an din champha vawi 39 na lawmna hun Govt. Durtlang Middle School-III tualzawlah an hmanga a. He hun hi Aizawl North Constituency bialtu MLA leh Cabinet Minister ni bawk Pu Vanlalhlana chuan Khuallian niin hun a hmanpui.

Khuallian Pu Vanlalhlana chuan Leitan Branch YMA Rising Day lawmnaah hian thusawina hun hmangin Leitan Branch YMA in a din champha vawi 39 na a thleng theite chu a lawmpui thu a sawi a. YMA chu pawl ropui tak a nihzia sawiin; Leitan Branch YMA chhunga Kohhran hrang hrang Thalai Pawlte'n YMA Rising Day lawmnaa chanvo an nei thei chuan YMA huang zuahzia leh a ropuizia a ti lang chiang hle a ni a ti a. Pu Vanlalhlana chuan Hlawhtlinna chungchang sawiin, Hlawhtlinna thuruk chu taimakna, bei hram hramna, hun vawn dik leh mahni fel taka in vawnte a ni tiin he huna kalkhawmte chu fuihna thu a chah bawk a ni. Khuallian hian Rising Day lawmna puala Leitan Branch YMA-in chawimawina hrang hrang a siamte semchhuahna a nei nghal a. Chawimawi phute chawimawi hi Kristian nun ze pawimawh tak a nih thu Pu Vanlalhlana chuan sawiin YMA chu chawimawi phute chawimawi a, tanpui ngaite tanpuitu pawl ropui tak a nih a tih thu a sawi lang bawk a ni.

Leitan Branch YMA Rising Day vawi 39na lawmnaah hian Branch President Pu K. Lalzuiliana chuan he huna kalkhawmte hmaah inlawmna thu a sawi a. Nl. PC Zonuntluangi chuan hun  kaihruaiin; Upa Lalramliana Ralte, Leitan Branch YMA Branch Secretary ni hmasa ber chuan hunserh a hmang a ni. He hunah hian Branch chhung Section Fai inelna lawmman sem niin Saizahawla Section-te’n lawmman pakhatna an la a, Chawngbawla Section-te’n lawmman pahnihna la in, Taitesena Section-te’n lawmman pathumna an la a, Section Fai inelna lawmmante hi Leitan Local Council aiawhin Pu Vanlalhriata Pachuau chuan hlanna a nei a ni.

Leitan YMA Branch hi tun hma chuan Durtlang Branch YMA Section pakhat (Section A)a ni thin a. November ni 25, 1986 khan Ramthar Area (Section F) nen Durtlang Branch atangin an indang a, an indan tirh hian hruaitu an nei nghal lo va, Branch hming pawh an nei lo a ni. December ni 9, 1986 khan Branch Hruaitu thlanna neih a ni a, hemi ni hi Rising Day atan hman zui niin Central YMA-ah Leitan leh Ramthar Area chu Durtlang Leitan Branch ti a ziahluh a ni ta a ni. 

Kum 2024 khan Durtlang Leitan Branch YMA atang hian Leitan Ramthar Branch YMA hi a lo indang tawh bawk a ni.

Leitan YMA Branch Rising Day vawi 39 na lawmnaah hian Leitan Branch YMA chhunga Kohhran, Local Council leh tlawmngai pawl hrang hrangte bakah Durtlang Branch YMA hruaitute an tel thei a ni.