No.3373/2020-2020

Aizawl North III MLA Pu C.Lalmuanpuia chuan vawiin tlai dar 3:00 khan Edenthar Veng YMA Hall-ah YMA Kumpuan ‘Zirna Uar’ a hawng. Edenthar Branch YMA-in Kumpuan a hawnna inkhawm hi Social Distancing ngai pawimawh chungin Branch Committee leh sawm bik khawtlang hruaitu mi tlem te chauh an kal a ni.

Kumpuan hawngtu Pu C.Lalmuanpuia chuan kum 1996 leh 1997-ah CYMA-chuan Zirna Uar tih hi kumpuanah a lo hmang tawh a, Central YMA-in 2020 leh 2021 kumpuan atana Zirna Uar a thlang leh chu lawmawm a tih thu a sawi a, Mizo zingah IAS leh IPS leh India Civil Services te kan tlem tawhzia a sawi a, Kohhran leh khawtlang angin tan lak a ngai tawh hie a ni a ti a, a MLA bial chhungah IAS, IPS leh India Civil Services tling thar an awm chuan lawmpuina tha tawk tak pek a inhuamthu a sawi a ni.

Pu C.Lalmuanpuia chuan Zirna uar turin Zirlaiten theihtawp an chhuah lehzual a ngai tawh a, nu leh pa pawh an pawimawh hle a, nu leh paten zan lamah programme siam tam loha naupangte uap that a ngai hie a ni a ti. Naupangten zan men rei loha zing hma taka an thawh theih nan YMA-te nen hma lak a tul a la rin thu a sawi bawk. Literacy rate-ah pawh Mizoram chu 2001-ah pahnihna a ni a, 2011-ah pathumna a ni ta chu Mizo mipuite tan lak a ngai hle a ni, a ti.

Bialtu MLA Pu C.Lalmuanpuia hian Edenthar Branch YMA Hall-a dah turin Table Tennis Board pakhat Edenthar YMA hnenah a pe bawk a ni. 

Mizoram puma kumpuan bawhzui tha lawmman pakhatna Edenthar Branch hian a dawng a ni.