Vawiin khan Aizawl SP chuan Aizawl khawpui chhunga khualbuk leh thlen in Hotel/Guest House enkawltute kokhawmin ruihhlo leh ruihtheih thil, silai leh ralthuam tawlhrukna leh a ti thin te, mihring hmanga sumdawnna leh firfiaka che, hel pawl te, an thlen inah an thlen loh nan hemi chungchanga inhrilhhriatna hun ‘ Awareness Programme on Drugs & Arms Traffickers/Smugglers for Hotel Owner/Manager’  Aizawl SP Conference Hall ah an hmang.

Hun hmanpuitu Pu Lalbiakthanga Khiangte, IPS, DIG, Northern Range chuan khualbuk leh thlen inah te mikhual chitin chitang an thlen avangin hotel enkawltu te tan fimkhur a pawimawh hle a, ruihhlo, silai leh ralthuam tawlhru leh mi thalo an thlen loh nan heng mihring ang te chu thliarthiam a, lo hnar thin turin a hrilh a. Misual te hi an fimkhur ve thin avangin hotel manager te hian hetiang mihring thleng tumte chu lo chik a, an rinhlelhawm em tih te leh an chanchin te chik ve turin leh hetiang hi an awm palh anih chuan Police lam te bengvarpuia, an chanchin Police lam hriattir vat thin turin hotel enkawltute a chah a. State thenawm atangin hel pawl lo biruk tum te pawh tun hmain man an lo nih dante sawiin DIG chuan hengte lakah pawh hian fimkhur a tul hle tih a sawi bawk a ni.

Pu C. Lalzahngoa Senior SP, Aizawl chuan Aizawl-ah pawh zin veivak mi chitin an tam tawh avangin khualbuk leh thlen in enkawltute tan kawng engkimah fimkhur a tul tiin Police pawimawhna chu hre reng turin hotel enkawltute a chah a. Chutih rualin awareness programme ah hotel enkawltute an kim thei lo chu pawi a tih thu sawiin an mangan leh buai in Police hre hmasa bera an pun thin angin anni pawhin Police lam thil tih leh hetiang programme ngaihpawimawh nachang hre turin hotel enkawltute chu a chah bawk a ni.

Pu KL Vulmawia, Addl SP(Adminstration) chuan mikhual thlen kawngah fimkhurna tur kawng hrang hrangte, hriat tur pawimawh te leh dan in a phut ang, zawm ngei ngei tur ang chi te sawiin hun a hmang a. Hotel enkawltu pawhin hemi kawnga an tawn te sawiin Police nena thawhhona tha a ngheh leh zual nan hetiang thliah an lo fimkur leh zual tur thu te an sawi a ni.  Pu Lalmalsawma Hnamte, Addl. SP(Crime) chuan lawmthu sawiin hun a khar a ni.

Vawiina Awareness Programme ah hian Police in khualbuk 35 an chhinchhiah zingah khualbuk 20 enkawltu an tel a ni.