Mizoram PWD chuan thu chhuah siamin Aizawl – Thenzawl - Lunglei kawng chungchang hetiang hian an tarlang :
Aizawl - Thenzawl - Lunglei Road hi World Bank sum atanga siam niin kum 2011 khan hawn a ni. A kawng thuizawng hi 164.000 kms a ni a, State Highway a ni. A zau zawng hi 7.45 m a ni a, a blacktop zau zawng hi 5.50 m a ni. Tlawng Lei hi 143.750 kmp ah a awm a, Pukpui hi 155.000 kmp ah a awm. Tlawng Lei leh Pukpui inkar hi kumin hian nasa takin a chhia a ni.
A CHHIAT CHHAN TLANGPUI ( Tlawng leh Pukpui inkar ):
1. Kumin hi ruahtui a tam em em mai a, March thla atanga October thleng hian ruah a sur nasa a, helai hmunah hian tuihna a tam em em bawk a, lei a lo thawl (loose) bawk nen, landslip tam tak (hmun 64 velah) a siam a. Heng land slip te hian side drain a hnawh a, landslip leh side drain te hi han clear thin mah ila, a tuk lawka ruahsurin lei nem lutuk tawh bawk si kha a hmun ngaiah landslip a siam leh thin a, kawng chhuat tuiin a chiah tam phah em em a ni. Hei hian kawng chhuat a tichhe nasa a ni.
2. Tlawng leh Pukpui inkar hi dam hmun a ni a, kawng tluan deuh thaw in teak chinna hmun a ni a, ni eng a hmu mang lo tih theih a ni. Dam (hnawng rengna hmun ) hmunah hian kawng a chhe hma zual em em a ni.
3. He kawng hi a lun em em a, Mizoram chhim lam pan motor lian zawng zawng hian an zawh a ni. Motor liante hian an phurh rih zawng tur bituk aia tam an phurh thin avang hian pressure a pek tur chhut lawk aia tam daih pressure a pek avangin kawng chhuat hian a dawl lo a ni. Truck ke 6 (paruk) neite hian 9 mt chin chauh phur tur an nih laiin a tlangpuiin 12 mt - 15 mt an phur tlangpui, chutiang bawkin 12 wheel truck te hi 21 mt chin chauh phur tur an nih lain 25 mt - 30 mt te an phur a, hei hian kawng chhuat a tichhe nasa a ni.
HMALAK DAN TLANGPUI :
1. Kumin financial 2017-18 hian Aizawl - Thenzawl - Lunglei road (Kanghmun 100 kmp to Lunglei AOC 164 kmp) siam nan hian Rs. 270.00 lakh dah a ni a, hei hian theihtawp chhuah a kawng hi kumin financial year chhung ngei a siam zawh hman tum a ni.
2. Pukpuiah hot mix plant dah a ni a, chuta tang chuan heng kawng siamna tur hi theihtawp chhuah a mix te her chhuah a kawng hi siam tum a ni.
3. Tunah hian ruah a la sur rih deuh avangin quarry panna kawng tam ber hi kutcha road a nih avangin a nal a, motor aia lut thei lova, kan hmuh theih ang ang boulder te la a, kawng khuar hnawh a hmalak mek a ni. Ruahtui tla te a reh a, quarry tam zawkah motor a luh theih veleh a chak thei ang ber a lung lak a, hmalak tum a ni. October kar tawp vel atang hi chuan khua a thal chuan black top hna pawh tan ve hman tum a ni.
4. Tlawng leh Pukpui inkarah hian leimin a tam em avangin paih fai a, side drain te clear ve.k tur hian tunah pawh private JCB 4 (pali) leh tipper 2 (pahnih) hmanga hmalak mek a ni bawk.
