NO.300/2020-2021

Khawvel hmun hrang hrang ang bawkin India ramah pawh hmui tuamna (mask) leh PPE Set duhkhawp lei tur a awm lova, chu harsatna chu hriain Aizawl West-I Bialtu MLA Pu Zothantluanga chuan hmui tuamna (mask) siamna tur puanthan engemaw zat leiin puanthui thiamten tlawmngaih chhuaha an lo thui hnuah a Bial Aizawl West-I chhunga Veng hrang hrangte mamawh dan ang zelin a sem a ni. Pu Zothantluanga, MLA, chuan PPE Set thuina tur puan than leiin, Zotlang Venga puanthui thiamten ram tana an tih ve theih tawk tiin thahnemngai takin Set 32 zet an thui chu vawiin khan Zotlang Veng Local Task Force hnenah a hlan.

Aizawl West-I Bialtu MLA Pu Zothantluanga chuan Task Force duty-na hmunah amah ngei kalin PPE Set hak dan turte, a hman dan turte inhrilhfiahna hun a hmanpui a. Covid-19 avanga ramin harsatna a tawh mek karah Lockdown lai pawha mahni in lamah Vengchhunga puanthui thiamten ram leh hnam tana ke an pen chhuak a, engmah hlawh leh hamthatna phut hauh lova thanemngai taka Mask leh PPE Set an lo thui thei chu a lawmawm takzet a, an zarah Aizawl West-I Bial chhung mipuiten hmui tuamna leh PPE Set nghei lovin an awm thei dawn a ni a ti. Heng puanthui thiamte inpekna chungah Pu Zothantluanga chuan lawmthu sawiin Covid-19 avanga engemaw vanduaina lo thleng palh theiah pawh Task Force-te chu rilru ngaihngam takin an duty thei dawn ta hi a ropui tak zet a ni a ti bawk.

Vawiin vek khan Aizawl West-I Bialtu MLA Pu Zothantluanga chuan Zotlang Branch YMA hnenah a tul huna an hman atan PPE Set engemaw zat a hlan nghal a. A bial chhung khua/Veng dangte hnenah pawh a tul dan ang zelin mask leh PPE Set a semchhuak zel dawn a ni.