1347/2024-2025

Dated Aizawl, the 29th July 2024 : Vawiin chawhma dar 11 khan Health & Family Welfare Department leh pawl hrang hrang tangrualte huaihawtin World Hepatitis Day 2024 chu kumin thupui thlan "Its time for action" behchhanin Taxation Department Auditorium, MINECO, Khatla, Aizawlah Health Minister Pi Lalrinpuii hova hman a ni. He hunah hian National Health Mission, NVCHP, MSACS, PATH leh SHALOM Society hruaitute bakah, Aizawl West College, Aizawl North College leh ICFAI University-a zirlaite an tel a, mithiamte hnen atangin Hepatitis chungchanga hriattur pawimawh leh thu bengvarthlak tak takte ngaihthlak a ni.

Khuallian Health Minister Pi Lalrinpuii chuan Hepatitis lo insiam theih dan bakah a darh chhan hrang hrangte leh inven dan kawng hrang hrangte a tarlang a. Khawvel pum huap pawhin Hepatitis chu um bo tura chak taka hmalak mek zel a nih thute, he mi atan hian mi tinin chanvo pawimawh tak kan neih theuh bakah mipui vantlang hnenah pawh zau zawka heng thute hi puanzarpui turin kalkhawmte a sawm nghal bawk a ni.

Hei bakah hian he ni pual hian mithiam hrang hrangte hnen atangin thusawi ngaihthlak a ni a. Dr. Eric Zomawia, Mission Director, National Health Mission (NHM) chuan Hepatitis inkaichhawn theih dan leh a lanchhuah dante a sawifiah a, Dr. Doris Lalnunmawii Sailo, State Nodal Officer, NVHCP chuan kumin World Hepatitis Day thupui sawizauin hmathlirte a tarlang a, Dr. Chawnglungmuana, CEO, SHALOM Society pawhin Hepatitis laka inven dan tih thupui hmangin zirtirna a pe bawk.

World Hepatitis Day puala hun hman hi Dr. Vanlalsawma, Principal Director, Health and Family Welfare Department  chuan lawmthu sawiin a khar a. Hemi hnu hian a duh apiang tan Health Department-a thawktute’n a thlawnin Hepatitis leh HIV test an neihsak nghal a ni.