1546/2022-2023

Aizawl, the 11th August 2022 : India ram zalenna champhaphak vawi 75-na lo thleng chho tur mekah a lawmna kal zel Azadi Ka Amrit Mahotsav pualin vawiin khan Assembly Annexe ah Aizawl DC Office leh Aizawl West CMO tangkawpte chuan Mizoram Legislative Assembly leh a chehvela Sawrkar Pisa hrang hranga thawktute tan Covid-19 hridanna Precautionary Dose a thlawna lakna vaccination drive an buatsaih.

He hunah hian Aizawl DC Dr. Lalhriatzuali Ralte chuan Aizawl District a hridanna pek dan tlangpui leh pek chin tawh te bakah vaccination dinhmun a tarlang a. AKAM puala a thlawna hridanna pekna hi September ni 30 thleng kalpui a nih tur thu sawiin hemi hun chhung hian hridanna second dose, la lote  leh kum 18 chunglam, second dose la tawh te chu Precautionary Dose la ngei tura ngenin a sawm a ni.

India ram zalenna champhaphak 75-na lawmna puala kum 18 chun chunglam te tana a thlawna dose kima Covid vaccine pek beihpui thlakna hi India hmun dang rualin Mizoram ah pawh July ni 14 2022 khan tan a ni a, September ni 30 thleng he beihpui hi kalpui tum a ni.

August ni 9, 2022 thleng khan Mizoram pumah kum 12-14 inkar mi 44929 in hridanna first dose la tawhin an zinga mi 27834 in second dose an la tawh a. Kum 15-17 inkar mi 63370 in hridanna first dose la tawhin an zinga mi 46456 in second dose an la a. Kum 18 chunglam mi 872197 in first dose la tawh in an zinga mi 731073 in second dose la tawh in, hemi atang hian mi 74093 in precautionary dose an la tawh bawk a ni. July ni 14 atang khan precautionary dose hi Sub Centre ah pek tan a ni a, tunah hian Fixed Session site pahnih Bawngkawn SC leh Chanmari SC ah te pek reng a ni.

Covid Vaccination hi Mizoramah January ni 16, 2021 atang khan pek tan niin ITI UPHC ah Aizawl East CMO in Health Care Worker te tan an pe hmasa ber a ni.