Pu Haukhum Hauzel chuan amah thlah tura lokalte hnenah, “Ka phu loh tawpa min fakna leh min chawimawina hi ka theihnghilh dawn lova, sorkar hnathawka hna hrang hrang Mizorama ka thawh ve na leh C.S hna ka thawhna ah ka theih tawpin ram leh mipui tana kan thawh hona kawngah lawmthu ka sawi a ni,” a ti.

Chief Secretary chhuak tur Pu Haukhum chuan sorkar-in kal tura a tihna apiangah phur takin All India Service mite chu kal tur an nih thu sawiin, thangthar leh tuna thawk mekte pawhin experience zau zawk zel kan zir tul a tih thu a sawi.

Sorkar hna a thawh chhungin mahni hamthatna turin hotu tlawn emaw, tu emaw duhsak bik ang chi a duh ngai loh thu Pu Haukhum chuan a sawi a, phuba lakna rilru pu a tu emaw tih chhiat tumna rilru pawh a put ngai loh thu kalkhawmte a hrilh a, C.S. hna chu hna hautak tak, mahse experience nasa tak neih phah nana hman thu sawiin, sorkar hnathawkte chu sorkar hmasawnnan a pawimawh ber, Minister ten thil tha an rawt chhuahte pawh ti hlawhtling a, ti hlawhtling lo thei an nih avangin fimkhur takin kal a ngai thin tih Pu Haukhum chuan a sawi bawk.

He inkhawmah hian Pu Lalrokhuma Pachuau, DG of Police chuan kalkhawmte aiawhin thu sawiin, Pu Haukhuma hnuaia a thawh chhungin Mizoramin nasa takin hma a sawn a, department tam takah, a bikin Police lamah kaisanna leh hna a lak thar tam tak a zarah hian neih anih thu sawiin, an ui thu leh a kalna zelah duhsakna a hlan.

Pu P. Chakraborty, Law Secretary chuan Pu Haukhum chu pa zaidam tak ni mahse, hnathawhna ah chuan a chak em em a, kum tam tak a lo hriat tawh anih thu leh a ui thu a sawi. Pu Lalramthanga, Chief Wildlife Warden chuan, mi chak tak Mizoram in an thlah a, mahse Delhi Administration ah emaw, Central Ministry ah a awm hunah Mizo mipuite tan mi tangkai tak ni turin a beisei thu a sawi.

Pi L. Tochhawng, Principal Secretary; Pu R.C. Thanga, Chief Conservator of Forest leh Pu Zorammuana, S.P., Aizawl ten Pu Haukhum hi thlahna thil pek an hlan a ni.