No.2649/2021-2022

Aizawl, the 19th October, 2021: Mizoram Sawrkar hnuaia State Level Expert Committee on Covid Management-in Covid - 19 dona atana 'All Mask Campaign' beihpui thlak a rawt chu Khawzawl District chhungah pawh October ni 19 atanga October ni 31, 2021 chhunga hman turin vawiin khan Khawzawl Bawrhsap leh Chairman, District Level Task Force on Covid-19 ni bawk Pu C.C. Lalchhuangkima hovin District Hospital, Khawzawlah hawn  a ni.

All Mask Campaign neih chhunga hmalakna kalzelah inkaihhruaina zawm tur District Bawrhsap leh Chairman, District Level Task Force on Covid-19 ni bawk Pu C.C. Lalchhuangkima chuan tichhuakin, himna tura inkaihhruaina siamte chu zawm theuh turin Khawzawl District chhunga mipui zawng zawngte a ngen nghal a ni.

All Mask Campaign hman chhunga zawm turte:
1. Chaw ei lai tih loh ah chuan facemask vuah/hmai tuam tur a ni.
2. Chhungkua pawh chaw kil ho loin, a hrang (buffet) a ei tur a ni.
3. Hnathawhna hmun, a bikin inchhung (indoor) ah te facemask tha taka vuah tur a ni a; thil ei ho loh tur a ni bawk.
4. Khawlaiah pawh facemask vuah leh CAB tha taka zawm tur a ni.
5. Kut silfai - sahbawn leh hand sanitizer hman uar leh zual tur a ni.

Covid-19 hi inchhunga inkai darh a nasa ber niin mithiamte chuan an hria a. Chutih rualin Covid positive-te hi a tam ber chu ni 10 chhungin an dam tih hriat a ni. Facemask vuah/hmai tuam tha taka zawm a nih chuan Khawzawl District chhunga hri inkaidarhna chu nasa taka a tlem theih a beiseiawm thu Bawrhsap ngenna siam chuan a tarlang bawk.