India Ambassador to Myanmar, Pu Gautam Makhopadaya chuan tun Inrinni (15.2.2014) khan Rih Sector, Indo-Myanmar Border Trade Point, Zokhawthar hmun a tlawh.

Ambassador Gautam Makhopadaya hian Inrinni chawhnu khan Champhai lo lutin Champhai Circuit House-ah Champhai Addl.D.C Pu Zoengsanga leh sawrkar mi pawimawh ten an lo hmuak. Hemi hnu hian Border Trade Point Zokhawthar hmun- tlawh turin a kal nghal a, hetah hian Champhai Imports & Export Syndicate, Central Custom & Preventive Force, Trade & Commerce department, Police lam hotute, DIPRO leh Zokhawthar khawtlang hruaitute nen Land Customs Station Building-ah inkawmna hun an hmang a, an harsatna chi hrang hrang an lo thlen zingah inkalpawhna kawngpui tha tawk lo chu khawchhak tlangdung mipuite harsatna lian ber anih thu an tarlang a. Border Trade in a ken tel thil pawimawh tak tak, Food testing Lab, ram pahnih ten Foreign Exchange ti theitu Bank neih dun ve ve, insumdawn tawnna tur bungraw chi hrang hrang 62 thlan chhuah tawh a taka kalpui an duh thu leh insumdawn tawnna atana thil tul pawimawh tak tak an lo thlen a ni.

Pu Gautam Makhopadaya chuan inkalpawhna kawngpui tha tawk lo chu a mit ngeia a hmuh thu sawiin, theih ang tawka hma lak a tum thu a sawi a, India atanga Myanmar kawng siam nan hian India sawrkar chuan sum tam tak seng mahse, India atanga khawchhak lamah thawn chhoh a tam leh si loh chuan India sawrkar tan in sen thlawnna a ni thei tih sawiin, a pawimawh berah chuan helam atanga sawrkar Revenue titam turin bungraw thawn chhoh a tam a ngai a ni a ti a. Ambassador hian he inkawmhona a an lo thlen tul dangte pawh hma lo lakpui a tiam a ni.

Hemi hnu hian Myanamr ram chhung, ramri depa inkalpawhna kawng dinhmun a enfiah hnuin India Ambassador to Myanmar Pu Gautam Makhopadaya chuan Champhai ah zan a riak a. Nimin (Pathianni) khan Aizawl panin a kir leh a ni.