Vawiin khan Mission Foundation Movement (MFM) School of Nursing (Auxiliary Nursing Midwifery) Capping and Lamp Lighting Ceremony tum 7-na chu I&PR Auditorium-ah hman a ni a. Aizawl Municipal Corporation Deputy Mayor Pu Lalringliana’n a hmanpui.

Khuallian Pu Lalringliana chuan Pu R.Vanlalzauva leh a thawhpuite’n Nursing School tha tak an din thei chu fakawm a tih thu sawiin, Nursing exam-ah result tha tak tak an neih thin avangin lawmpuina a hlan a. Health service chu hna ngaihsanawm ber a nih thu leh naute chu nu pum chhunga a awm lai atanga a thih thlengin Health Worker-te kutah a awm thu sawiin, Nursing hna chu Pathianin Mizote kutah a dah lian hlea a hriat thu a sawi bawk. Kan khawtlang inrelbawlna, kan tlawmngaihna leh nui hmel kan put deuh reng theihna te hi Mizote’n Pathian malsawmna kan dawn ropui tak a nih thu leh chapopui tur ni lova ngaih hlut tur a nih zawk thu sawiin, Khuallian chuan Health Worker-te tawngkam chhuak chu hnam tin tan taksa, rilru leh thlarau damna a nih theih thu a sawi a. Zirlai thu tiam la tharte leh zir chhuak tawhte pawh rawngbawlna rilru pua zir tur leh hna thawk zel turin a chah bawk.

Regional Institute of Paramedical And Nursing Sciences (RIPANS)-a Principal (Nursing) Pi Lalfamkimi, Trained Nurses Association of India, Mizoram Branch-a President ni bawk chuan zirlai tharte chu lukhum khumtirin khawnvar a chhittir a; zirlai tharte chuan thu tiam an sawi rual nghal bawk. Pi Lalfamkimi chuan lukhum chuan mi dang tanpui tura mawhphurhna a ken tel thu leh khawnvar hal chu mite rit phurh chhawk zangkhai tur leh anmahni tieng tura Florence Nightingale-i khawnvar chhit chhunzawm zelna a nih thu a sawi a. Nurse-te chu Lal Isua tihdamna hnung zuia chhunzawm tur an nih thu leh Health Worker pass chu zir tawpna a ni lo tih hriaa mahnia inzir zui zel a pawimawh thu sawiin, RIPANS Principal chuan Pathian tihna leh inpekna tak tak nen chuan eng kim a tih theih a ni tih hre reng chunga zir turin zirlaite chu a fuih bawk.

MFM Director Pu R.Vanlalzauva chuan kal khawmte lawmna thu a sawi a. Pi Zochhuanpuii, Registrar, Mizoram Nursing Council chuan Mizoram Nursing exam-a MFM School of Nursing atanga zirlai ti thate hnenah lawmpuina leh chawimawina thilpek a hlan ni.

MFM School of Nursing (ANM) hi September 2, 2009 khan din niin, mi sawmriat pasarih (87)-in an zir chhuak tawh a. Tunah hian Principal pakhat (1), Tutor panga (5), Non-teaching staff paruk (6) leh zirlai sawmli pasarih (47) an awm mek a. Pawl 12 pass hnua zir theih niin, kum 2 zir tur a ni a. Session hi October-September a ni. Tun tumah hian 1st year zirlai sawmhnih (20)-in thu tiam an la thar a ni.

He hunah hian MFM Nursing School leh College of Pharmacy-a zirlaite bakah, zirlai nu leh pa te, Nursing School hrang hrang aiawh leh MFM Board of Directors te an tel a ni.

Attachment

  • Loading attachment...