820/2022-2023
Aizawl, 8th June, 2022 : Kum danga tih tawh thin ang bawkin vawiin khan ni thum awh tur Aizawl Municipal Corporation hnuaia hriselna kawnga thawktute puala buatsaih "Health Awareness cum Health Screening" chu AMC Conference Hall, Thuampui-ah tan a ni.

Vawiina Health Awareness cum Health Screening hi National Health Mission hnuaia Urban Health Mission leh MSACS te tang kawp buatsaih niin, hawnna inkhawm hi Dr. David Zothansanga, State Nodal Officer, NHM in a kaihruai a. Pu Zothanmawia MCS, Commissioner AMC pawhin thusawina hun hmangin, AMC hnuaia thawktute tan mahni hriselna enfiah tur pawhin hun neih a har hle lai karah NUHM lam ten duhsakna lan tira Health Screening an rawn neih chilh leh thei chu lawmawm a tih thu a sawi.

Dr.Eric Zomawia, Mission Director NHM chuan tunlai khawvelah kan nunphung dik loh avanga mahni insiam chawp natna, NCD kan tih ten nasa taka min tihbuai tak avangin kan nitin hun hman danah kan fimkhur a ngai ta a. Ei leh in, zuk leh hmuamah te fihlima, taksa sawi zawi ngai pawimawh turin kan inchah thar leh a ni tiin thawktute chu mahni hriselna ngai pawimawh tur leh hriselna tichhe thei laka fihlim turin a chah a ni.

Vawiina Awareness cum Health Screening-ah hian Blood Sugar, BP Check, HB, HIV, chhul cancer leh a dang dang, a vaiin natna chi 10 chuang screening tih a ni a. Naktuk lamah chhunzawm leh a ni ang a, a ni thum ni-ah hian Tuirial Dumping Ground-a Garbage Truck Driver leh Bawlhhlawh haitute hriselna a that tawk leh tawk loh endiksak a ni leh ang.

Health Department Staff mi 17 ten vawiinah hian damlo mi 80 chuang an en a. Vawiin screening atang hian pum tha lo leh BP sang mi eng emaw zat hmuh chhuah an ni. Damlo te tan hian a tul angin a thlawnin damdawi sem nghal zel a ni bawk.