No.382/2020-2021

Vawiin khan Aizawl Municipal Corporation (AMC) chuan Mizoram Police ramri a duty te hman turin Solar Home Light 90 a hlan a. AMC aiawhin Mayor Pu PC Lalhmingthanga'n hlanin Mizoram Police aiawhin Pu John Neihlaia, IGP in a dawng a ni. Solar Home Light hlanna hi AMC Auditorium-ah hmangin Pu K. Laldingliana'n a kaihruai.

Thilpek hlan paha thu sawiin Pu PC Lalhmingthanga, Mayor chuan an thil hlan chu thil hlu ber leh tha ber ni lo mah se ngun taka AMC in an ngaihtuah hnuah tangkai taka an hman tur a nih beiseiin an hlan tih a sawi a. Mayor chuan AMC pawhin COVID-19 do nana theihtawp chhuaha hma a lak tawh thu sawiin he hripui hi ram ropui ber America pawhin do harsa an tih thu sawiin kei ni ram tehlul tan chuan tih theih a tlem hle a ni a ti a. Theih tawp chhuaha mitin te tawngtaia, Pathian auh a pawimawh a ni, a ti.


Mizoram Police aiawha thusawi Pu John Neihlaia chuan an mamawh em em AMC atanga an dawng chu lawm awm a tih thu sawiin tangkai taka an hman ngei a beisei thu a sawi a. Mizoram Police te ramri hmun hrang hrang 135-ah an duty mek thu leh COVID-19 kaihhnawiha social media lama thu dik tawk lo leh dan phal loh thehdarh a nih thin chu pawi a tih thu sawiin hetiang vang hian case engemaw zat an siam tawh thu leh mihring 25 an man tawh thu a sawi a. Social Media hmandik leh hman tangkai chungchangah mipui te thahnem ngai taka lo zirtir turin Councillor te chu a sawm a ni.

Hei bakah hian AMC Mayor chuan Councillor te hnenah an ward a Local Level Task Force tina sem tur Rs. 10,000/- (singkhat) a hlan a. Local Level Task Force tinte chuan an ward Councillor theuh hnenah heng pawisa hi lam turin AMC chuan a hriattir a ni.