Aizawl khawpui inrelbawlna tura din Aizawl Municipal Council chuan nimin November ni 16 khan kum 1 hmel a hmu ta a, hemi puala lawmna inkhawm Oasis Conference Hall, Thuampui venga neih chu Chief Minister Pu Lal Thanhawla leh UD &PA Minister Pu Zodintluanga ten an hmanpui a. MLA pahnih, Law Commission Chairman Pu R. Lalrinawma leh Pu K. Liantlinga te pawh an tel.

Khuallian Chief Minister chuan sorkar hnathawk te an pawimawh rualin mipui thlan te chu a chhe lai siamtha tura koh an nih avangin rorelna dik, tha leh fel awm theih nan mawh an phur bik a ni, a ti. AMC Councillor te chu lungrual taka hna thawkin eptu pawl te pawhin sorkarna chang te pawh hniam tumna aiin sorkar khalh ngil tumin mahni hma theuhah taihmak an chhuah nia a hriat thu a tarlang a. Thingtlang mi cheng tam zawk ten nasa taka khawpui an bawh avangin AMC te hian hmabak tam tak an nei dawn a, mawhphurhna tam zawk pek zel tum an ni na chungin a bul tan mek an nih avang leh dan leh hrai paltlang tur thahnem tak a awm avangin a tahtawla pek zel tum an ni, a ti.

Aizawl khawpui chu ruahmanna mumal awm lova chak taka thangchho a nih avangin a chep a, khawpui tawt ti ziaawm tura tanlak hi mitin mawhphurhna a ni tiin sorkar pawhin heng harsatna sukiang tur hian ngaihtuahna nasa tak a hmang mek a ni, a ti a. Tlangrama cheng kan nih avangin leimin leh leitawlh lakah min veng turin tuichheluanral tirna leh bawlhlawh paih chungchangah thawh tur hmabak tam tak a la awm thu sawiin khawpui leh a mi cheng hrim hrim pawhin thianghlim leh fai kawngah zirtur tam tak kan la neih thu a sawi tel bawk a. Chief Minister chuan khawpui chei a ni emaw, kawngpui siam emaw kawlphetha dehchhuah lam leh hmasawnna dang reng reng tithuanawp fo thin chu zangna dawmna (compensation) thlakhlelh lutukna hi a ni tiin hmasawnna tura sum ruahman aia zangnadawmna sum a tam zawk chhung chuan hmasawnna tak tak neih a harsat a rin thu a sawi a ni. Mi tam ber te tana tha ber tur ngaihtuah hi sorkar tum ber a ni, Pu Lal Thanhawla chuan a ti.

Thusawitu dang UD &PA Minister Pu Zodintluanga chuan AMC dinchhuah tan dan te, State dang tihdan zira an fehchhuah thin thu te, ADA leh Sanitation atanga thawktu lakkhawm a nih dan tlangpui te tarlangin 13th Finance Commission in kum 2011-12 atana Urban Local Body Grant, sumhmahruai cheng nuai 590 a dawn fel tawh chu AMC-ah hlan thuai a nih tur thu a sawi. Mizoram sorkar hmachhawp pui ber NLUP sawilangin Pu Zodintluanga chuan khawpui chhung veng hrang hranga he chhawmdawlna sum dawngtute chu hlawhtlinpui ngei tura fuihtuah tang turin AMC Councillor te leh Local Council hruaitute a sawm a. Rethei leh hausa inkar pawtzim thei tur he ruahmanna hi a rilru hnual zawnga mi te hnena sawi thin lo turin a chah a ni.

Nimina inkhawm, CEO Pu Nghaklianmawia kaihhruaiah hian UD &PA Principal Secretary Pu R.L Rinawma chuan AMC chu rampum huapa entawntlak nih tir tuma sorkarin ruahmanna hrang hrang a kalpui mek dan a sawi.

AMC kum khat tlin lawmpuinan Chief Minister nupui Pi Lalriliani chuan Councillor tin te hnenah pangpar a hlan theuh a ni.