No.1931/2021-2022

Aizawl, 19th August, 2021 : Mizoram sawrkar hnuaia kum 2008 hma lama DRDA hnathawktu lakte, Rural Department hnuaia seng luh leh dah ngheh an lo nih tak avangin vawiin khan All Mizoram DRDA Employees Association(AMDEA)hruaituten Rural Development Minister Pu Lalruatkima chu a office ah hmuin kum tam tak an service chungchanga harsatna an lo neih tawh sutkiana a awm leh, RD Department hnuaia lakluh an nih theihna tura chak taka hma lak a ni chu lawmthu an sawi a. Minister hovin DRDA hnathawh leh hlawhtlinna te, an hmachhawpte nen an thlir ho a ni.

Pu Ruatkima chuan AMDEA ten rilru thlamuang tak leh hlim taka hna an thawh theih na tura an service tihfel a lo ni ta chu a lawmpui thu sawiin hei hi ama mimal hmalakna ni mai lovin, Chief Minister Pu Zoramthanga kaihhruaina hnuaia Mizoram sawrkar pumpui hmalakna leh hlawhtlinna a nih thu a sawi a. Chhungkaw 84 laiin an chhawr tur chu lawmawm a tih thu a sawi bawk.

Minister chuan kum khat leh a chanve vel zet hripuiin Mizoram a tuam chhunga thingtlang a chengten ei leh bara harsatna lian tham an tawk lo chu a vanneih thlak tak zet tih sawiin hei hi Mizoram sawrkar-in Rural Development hnuaia ni 100 inhlawhna, Mahatma Gandhi National Rural Employment Guarantee Scheme (MGNREGS) a kalpui that vang a ni, a ti a. Kum 2 kalta chhung khan thingtlang mite chu MGNREGS hnuaiah hian ni 100 chhung inhlawhna siamsak an niin kumin 2021-22 chhungin district tinah ni 50-60 inhlawhna saimsak an ni leh tawh bawk, a ti a. Geo-tagging ah Mizoram chu India ram pumah pakhatna niin tehna hrang hrang dangah pawh a sang ber pawl a ni, a ti a. Shyama Prasad Mukherji Rurban Mission(SPMRM) ah pawh Mizoram chu India ram pumpuia Critical Gap Fund hmang tha ber dawttu niin hei vang hian Ministry of RD atanga sum rawn pek chhuah kawngah harsatna a awm lo, a ti a. Hetiang taka Rural Development Department in hna a thawh that theihna chhan lian ber pakhat chu thingtlang khaw tina Village Council te nen thawh hona tha tak a awm avang leh VC ten sawrkar an tawiawm that vang a ni, tiin a sawi.

AMDEA atanga thawktu nghet atana lakluh te hi an vaiin mi 84 an ni a. Chumi zingah chuan Gazetted post 25 a tel a. Post dang 13, AE-7 leh JE-6 te pawh tihfel thuai tura beisei a ni.